Dominican Republic environment & natural resources minister chu a pisa chhungah a thianpain a kap hlum niin thuneituten an sawi.
Kum 55 mi, Orlando Jorge Mera hian beih a tawh lai hian meeting a nei mek a, sipai puak vawi ruk vel hriat a ni.
President thupuangtu chuan a kaptu hi Miguel Cruz-a a nih thu leh minister nen hian naupan lai atanga inkawm tawh niin a sawi.
Man nghal a ni a, a thianpa a kah hlum chhan hi hriat a la ni lo.
Jorge Mera-a chhungten thuchhuah an siamah pawh a naupan lai ata tawh a thian tha ngeiin vawi tam tak a kap tih an tar lang.
“Hetiang titu hi kan chhungkua chuan kan ngaidam a. Orlando-a thurochhiah hlu tak hi kan vawng zel ang,” an ti.
Jorge Mera-a hi President Luis Abinader-a’n July, 2020 atanga thuneihna a chan hnuah sorkarah hian chanvo pawimawh a chelh tan.
President Abinader a chhungte a tawrhpui tak zet thu leh a thian tha ngeiin a thihna a thlen ta mai chu lungchhiatthlak zual a tih thu Twitter-ah a tar lang.
Cabinet for innovation-a director, Bartolomé Pujals pawhin Jorge Mera-a thihna chu a lungchhiatthlak thu leh social media-ah pawh sawi zui loh ni se a duh thu a sawi bawk.
Jorge Mera hi president hlui, Salvador Jorge-Blanco-a fapa niin rorel lai, Modern Revolutionary Party (PRM) dintu zinga mi a ni.
A nupui, Brazil-a an ram palaia awm mek legh fa pahnih a kalsan a. A fa zawk chu PRM MP tho a ni ve bawk.