Hachhek Bial Kuhva Chingtu Pawl (HBKCP)-in Myanmar atanga Mizoram kaltlanga kuhva tawlh lut thin leh hetianga sumdawnna thila inrawlhte chu June thla ral hma ngeia man chhuak turin chief minister an ngen.
HBKCP-in chief minister hnena ngenna an theh luhah hian dan lova Myanmar kuhva Mizorama lut thin leh hetianga sumdawnna (smuggling) thila inrawlhte leh an thurualpuite chu Mizoram sorkarin man chhuak se an duh thu tar langin, Mizoram chhunga dan lova Myanmar kuhva ro awm leh stock godown awm zawng zawngte pawh June thla ral hma ngeia thiah vek a nih theih nan sorkarin hma la se an duh thu an tar lang.
Karimganj district chhunga Patharkandi MLA-in an kuhva thar chhuahte chu ‘Burma Kuhva’ tia a puh luih tlat thu an ngenna lehkhaah hian an tar lang a, Karimganj district official-ten an hriatthiam theih tura Mizoram thar chhuah ngei a ni tih certified-sak tura Mizoram sorkar an beisei thu leh an ngen thu an ziak lang a ni.
Heng bakah hian Hachhek bial mipuite eizawnna ber, kuhva huan changtlung zawk leh hlawtling zawka kalpui a nih theih nan Hachhek bialah lo neitute dawr phak mi thiam, damdawi leh fertilizer te mipui ban phaka office leh godown changtlung tak dah turin Mizoram sorkar an ngen thute ziak lang bawkin, ram chhung kuthnathawkte thlai chin ang, ram dang atanga dan lova lak luh awm thin reng reng chu ram chhung lo neitute himna ngaihtuah chunga titawp thuai turin Mizoram sorkar an ngen tih an tar lang bawk a ni.