Aizawl: Mara Autonomous District Council (MADC)-a MNF nena sorkarna siam Congress MDC-te chungchang chu nimin khan MPCC Political Affairs Committee (PAC)-in a ngaihtuah a, an insawifiahna zir chiang turin disciplinary action committee an ruat.
MADC inthlanpui neih zawh takah khan Congress party-in seat li an la a, MPCC thuneitu sang, PAC-in an party chu eptu lama thu turin Mara mipuiin an ti nia ngaiin MNF emaw, BJP emaw thawhpui loh an rel a, hetihlai hian MDCC leh MDC palite thutlukna anga MNF nena sorkar siam an tum leh tak avangin PAC chuan MDC-te chu sawifiah turin an ti.
Congress MDC insawifiahnate chu nimin khan PAC thukhawmin a ngaihtuah a, disciplinary action committee chu hma la chhunzawm a, a tul an tih chuan MDC-te va pana zirchian an rem ti a; an rawtnate chu PAC-a an thehluh hunah ngaihtuah that leh an tum.
Thudawn danin Congress MDC-te hian an insawifiahnaah chuan NDA a thawkho sa BJP leh MNF-in sorkarna intawm an siam theih tak lovah chuan an mite eptu lama an lo awm rei tawh avang leh rorel lai lama thut an duh ve tawh thute an tar lang.