Aizawl : Congress party thalai chuan Mizoram sorkarin zu khapna dan MLP Act 2019 leh MLP Rules a pawm danah Grape wine chungchanga thutlukna an siam dan chiang taka puangzar vat turin an phut.
Nimina an thuchhuahah MPYCC chuan, Mizoram sorkar leh Grape chingtute inkara ‘inhriatthiam tawnna’ hmanga Grape Wine zawrhchhuah a nih mek laia, May 27, 2022-a thuneitu sang atanga thu an hmuh bawhzuia Excise and Narcotics Department (END)-in Aizawlah Grape Wine thahnem tak an man sak chungchangah thu leh hla mumal tak nei vat a, kuthnathawktute leh an thawhrah zuartute chungthu hi rel fel vat turin an ngen tih an sawi.
MPYCC hian, Excise Minister Dr K Beichhua’n tun hnaia Grape Wine an man sakte chu zu an ‘check’ na lama ‘man palh’ nia a sawi hnu lawkah, June 6, 2022-a END thuchhuakah MLP Act 2019 danah thil tuiril ‘alcohol’ pai tel reng reng chu man theih a nih thu an tar lang leh si tih an sawi a. Mizoram sorkar hian MLP Act 2019 leh MLP Rules a pawm danah Grape Wine chungchanga a thutlukna hi chiang taka puangzar vat turin an phut tih an sawi bawk.