HNAM DANG CS

• HC Vanlalruata

Ka ziak ve lovang, ka ti zet na a, thil lo thleng zui zel thei te ngaihtuah chung leh, hnamdang Chief secretary hrim hrim duh lo anga Mizo hnam pumpui hi kan lang thei mai dawn a ka hriat avangin ka rilru ka thlak leh e. Khawvela ram leh hnam ropui leh hausa ber ber pawh hian, hnamdang ngaihtheih lohna thinlung (xenophobic sentiment) hi chu an nei vek mai. Zalenna duhtu apiang lo lawm (welcome) thintu United States te, Australia leh ramdangte pawhin a sakechek nazawng an rama an luh theih lohna turin ‘immigration law’ khauh tak tak an siam vek tawh a nih hi.

India Hnam Pa ti a koh, khawvel mihringte inthianthatna puangtu Mahatma Gandhi ngei pawh khan, India ram chu tukverh hawng turin a duh a, mahse, a thei thei India rama an lo luh theihna atana kawngkapui lo hawn huau kha a duh lo. He thinlung hi tun ang khawvel inhawn tawh hunah hian tlem tlema her rem a ngaih chang a awm a; a bik takin India ram bungkhat a awm kan nih miau si avangin, India khua leh tui diktak te laka kan rilru puthmang hi thlâk hret hret ngai a awm a ni.

Mizoramin hnamdang Chief secretary kan neih chanchin hi chhiartute hriat atan chhui hret a ngai awm e. Chief secretary hna chelh lai Pu Lalnunmawia Chuaungo chu pension a a chhuah hma hretah, ama duh thu a chhuak (pension)-in Chief Information Commissioner ni tura ruat a ni a. Hetiang a nih takah chuan Mizoram sorkar chuan nikum November ni 1 atanga Chief secretary dinhmun chelh turin Chief minister pisa a Additional Chief secretary hna chelh mek, Pu J.C. Ramthanga (1989 batch Manipur cadre) chu Chief secretary atan a ruat a nih kha.

Mahse, chutianga sorkarin ruahmanna a siam mek lai chuan civil service ho chunga thuneitu Ministry of Home Affairs (MHA) chuan, Mizoram sorkarin Chief secretary atana Pu J.C. Ramthanga a ruatna chu ngawi renga hnawlin, June 2011 leh August 2012 a Mizorama rawn awm tawh Pi Renu Sharma chu Mizoram Chief secretary atan a rawn ruat thuah ta mauh mai a. All India Service zinga AGMUT cadre mite chunga thuneitu (cadre controlling authority) ber MHA-in a rawn tih miau chuan, Mizoram sorkar tan chuan tih vak ngaihna a awm lo.

Chuvangin Pi Renu Sharma chuan Mizoram Chief secretary hna chu a rawn chelh ta a. Chief minister Pu Zoramthanga’n theihtawp chhuahin sorkar laipui a thuneitute dawrin ngen mahse, khulamin an thutlukna an thlâk duh malêk a nih kha. Chief minister-in he thil hi tláwm patawka a la pawh kha a thiamawm a; a chhan chu tunhma lam zawng kha chuan state Chief secretary leh DGP hi chu Chief minister duhdan anga kalpui thin a ni a. Chief minister duhdan diak diaka ruat an nih loh pawhin a râwn tal chu an ráwn ve thin. BJP kaihhruai NDA sorkar hian khatiang khan thil an ti ta miau lo a. Sorkarna chelhtu MNF hi NDA a tel ve an nih avangin Chief minister hian a lungawi loh thu a thlen na hle hi a thiamawmloh lem lo.

A mak ta ber chu Central YMA kaihhruai, NGO Coordination Committee-in khatih lai tak mai, thir sa den hun lai taka ngawi daih si a, tunhnai a hnamdang Chief secretary bang tura nawr a, a pisa kal tur dan an tum thu an puang kha a ni zawk. Manipur cadre mah ni sela Chief secretary atana Mizopa Pu J.C. Ramthanga (Mizoram sorkarin a chhawr sa reng) dah tura Mizoram sorkarin na taka a nawr lai leh, hnamdang rawn dah lo tura Chief minister pawhin theihtawp a chhuah lai a nghavawk hrám ang mai a ngawi reng si, tun a tak a boruak an rawn siam thar kha mak tih loh rual a ni lo.

A chhan chu hetianga CYMA kaihhruai NGOCC-in Chief secretary pisa kal tur dan an tum ni hi, Pu J.C. Ramthanga pension a a chhuah hma ni tak a ni miau a. Keini sipai bang ve lo pawh kan bo map mai. NGOCC hruaitute hi mithiam a ngaih, Professor te leh puitling tak tak tura ngaih bawk te an ni a. IAS leh IPS cadre hrang hrangte insawn kual pawlh awlsam leh harsat dan pawh hre tura ngaih an ni. UT kan nih lai atanga an siam, tun thlenga cadre khat a la awm – Arunachal Pradesh, Goa, Mizoram leh UT (AGMUT) cadre hi MHA thuhnuai a awm bik a ni, tihte pawh hre ruala ngaih an ni bawk.

Chu chu thil awmdan a nih miau avangin kan state sorkar hnuai a awm mek (cadre dang mah ni se) Mizopa Chief secretary a dah tura na taka a hun a nawr si lo, chu ngei mai chu a chawlh hma ni chiah a hnamdang ti a, Chief secretary pisa kal tur dang tura an thurolum neih chhan kha hriatthiam a har em em lai chu a ni. A hriate’n an sawi dan chuan, Mizoram Chief secretary atana Mizo ngei kan duh nghet tlat a nih chuan, tun dinhmuna Mizo zinga CS ni thei chu, tuna Jharkhand state a Additional Chief secretary hna chelh mek, nakum kum bullam a Jharkhand Chief secretary ni mai tur, Pu Lalbiaktluanga Khiangte chauh khu a ni.

Pu Lalbiaktluanga Khiangte (Jharkhand cadre, 1988 batch), tuna kan CS Pi Sharma-i nena batch khat khu kum 2024 a pension a chhuak tur niin an sawi a. Kan han zawh zau deuh chuan amah chuan Mizorama CS-a lo chhuah chu a châk lutuk hranpa lo na-in a hreh lutuk chuang lem lo bawk. Amaherawhchu, inter-cadre transfer/deputation hi a buaithlak viau niin an sawi a. A awlsam theih mial dan leh a harsat dan sawi tur chuan kan hriatna-in a pha kher lovang.

Pu Lalbiaktluanga hi kan NGOCC hruaitute duhdan ang tak hian (ani lo chu Mizo IAS officer zingah kan CS han ni thei hnai an awm miau si lova) Jharkhand sorkarin a rawn chhuah an phalsak a ngai phawt a, lo phal pawh ni sela, AGMUT cadre ami All India Service (AIS)-te chunga thuneitu MHA remtihna a ngai ngei ngei dawn tho. MHA-in rem a tih miau loh chuan hetah lungawi lohna lo lantir eng ang mah ila, kori a tu vakin a rinawm lem loh.

Hetiang tak hi a ni, kan pawl lian, ropui leh zahawmte chetsual fona chu. Ngaihtuah chiang lo leh a nghawng thuizia tur dâwn pha lova, a pawngapui-a boruak siam an ching hi a fuh ngai lova, tun hnu-ah pawh a fuh ngai chuang lovang. Hnam inhung bik nih hi damkhawchhuahna atana a that chin a awm laiin, hnamdang ngaithei hauh lo (racist) anga kan pawl hruaitute’n min lantir thin hi a pawi lai tak chu a ni.

Mizote nihna dik tak chu Rokunga’n hnamdangte thiana siam tura min fuih pawmtu kan nihna hi a ni a. India ram chhung leh pawn atanga lo zin tam takin Mizo mipui mimir min hmuh dan chu, mikhualte chunga thatchhuah (hospitable) thin hnam kan ni. Hei hi Tourism lam atana kan thawh hlawk theihna ber tur a ni bawk. Chutianga khawvel mithmuha kan hmingthat vena chawkchhetu pawl lian leh zahawm hruaitute kan nei hi a vanduaithlak takzet a ni. Ngaihtuah chiang lova hetianga thiltih hi sim tawh turin kan mithiamte hian zihhau se a lawmawm khawp ang.

Ngun takin ngaihtuah ta ila, CYMA, MZP, MSU (pawl dang chu hmer tel rih lo ta ila) a hruaitu lawk ni pha chin hi kan political party liante hian insawhnghehna atan an ît riau zel ni hian a lang a. He’ng pawl lian hruaitute hi an party mi nghet leh hruaitute aiin inthlanna-ah tling thei zawk turin an ngai a, an sawm khu ruai zel bawk a. Hei hi ‘tlin loh hlauhna bawih’ atanga an chhuah loh vang mai a ni. Chumi-in a hrin chu pawl lian deuh hruaitute’n, an mimal hmakhua ngai a boruak siam hat a hlawk dawn a nih chuan, ngaihtuah chiang fumfe mang lova boruak siam an ching ta thin hi a ni ber.

An mimal hamthatna, boruak an siam thiam a, an lo lár viau avanga political party-te’n MP emaw MLA candidate atana an sawm huai huai beiseina hian he ram hi a tichhe thui ta viau mai. Mi a lo lâr viau a nih chuan kan khap ngawt thei lo. Mahse, lar khel a, chumi hmang tangkai a sorkara dinhmun tha chan tumte hian, he ram leh hnam hmel hi an timâwk rei ta hle mai. Tunah erawh chuan ngaihtuahna hmang leh thil chîk mite chuan an ‘game’ khelh hi an man chiang tawh viau mai a. An khelh zui zel chuan an hmabak atan thlán an lai lek fang a ni tawh dawn a ni.