Aizawl : Mamit District Task Force On Immunization chu nimin khan an chairman, Mamit Bawrhsap Lalnunhlua hovin an thukhawm a. Mamit district-a hri danna hrang hrang pekchhuah dan te an thlirlet.
Surveillance medical officer, WHO Mizoram bialtu Dr. Lalhlimpuii’n he thutkhawma a sawi danin, Mamit dist-ah kum 2021-22 chhunga vaccine pek tura ruahman 751-ah 721 tlinin, ASHA worker awm loh avangte, Health worker awm loh avangte, kawnga harsatna a awm thin avangte leh hri danna la duh lo hrim hrim an awm avangtein hri danna pek kawngah harsatna an tawh thin thu a sawi.
Nu, naupai leh naupang ten a hun taka hri danna an lak theihna turin department dangte tawiawmna leh thawhhopuina an mamawh thu Dr. Lalhlimpuii chuan a sawi bawk.
District Immunization officer Dr Lalnuntluangi Khiangte-in Mamit district-a COVID19 vaccine pekchhuah tawh dan sawiin, dose khatna la 56615, dose hnihna la 42941 leh precaution dose la 2508 an awm tawh thu a sawi a. Vaccine pe-in khaw 74-a In 11398 an tlawh tawh thu a sawi bawk a ni.