Education Minister Lalchhandama Ralte-in COVID19 vanga kum hnih chhung zirna pangngaia kalpui theih a nih loh avangin zirlai tam tak zirna pangngaia zir thei lo tih sawiin, hmangaihna leh hriatthiamna thui tak nena lo enkawl turin zirtirtute a chah.
MSU-in kumina HSSLC exam-a top 10-a lang Mizo zirlaite an chawimawinaah he thu hi nimin khan Education Minister chuan a sawi a. COVID19 vangin zirna pangngai dawng thei lo, pawl sawn ngai si zirlai tam tak an awm thu sawiin, “Kumdanga pawl 8 te kha kum danga pawl 8 ang an ni lo tih hriain zirtirtute pawhin hmangaihna nen in lo enkawl ta sa sa, hmangaihna tak tak Pathian atanga chhuak nen, missionary rilru nen lo dawngsanga, lo tawngpawn vin ngawt lova, an hun tawn hrethiamin lo enkawl rawh u” a ti.
Lalchhandama Ralte chuan nu leh pa te pawh hri leng vangin an fa ten class pangngai kal mumal lovin pawl an sawn tih hriatpui tura chahin, “Vil uluka, tanpui nasat leh zual an ngai, chuti a nih loh chuan nakin lawkah an zirnaah harsatna an tawk anga, drop out engemawzah kan neih phah thei a ni” a ti a. Zirlaite an lehkha zira an tui theihna tur leh nuam an tih theihna tura in lam boruak leh nuam siam turin a ngen bawk.
Zirlai te pawh an boruak hmachhawn chu a harsa tih hrilhin, nasa leh zuala an thawhrim a tul thu a sawi a. Hri leng vanga hun harsa te chu invuakthluk tir lova, tanlak zual a ngai nasa a ni tih thinlung pua, tumruahna nei zual turin a chah.
Lalchhandama Ralte chuan “Kan education quality te, kan syllabus te hi a hniam bik hran lo” tiin, CBSE syllabus nena inang, topic thlan thenkhat erawh dang hret chauh nia sawiin, “All India standard tho kan zir” a ti a. “Kan zirtirtute pawh all India level-ah pawh qualify tho an ni” a ti bawk.