Aizawl: Home Minister Lalchamliana’n SRS hun laia ruihhlo an do anga do leh chu Mizoramin a mamawh niin a sawi a. CYMA chu ruihhlo do kawnga thapui thawhtu nia sawiin, “Kum eng emaw zat kal taa SRS dina ruihhlo an do anga do leh kha kan ramin a mamawh hle niin ka hria,” a ti.
23 Sector Assam Rifles buatsaih ‘anti drugs awareness campaign’ tun thla ni 20 thlenga an kalpui tur a hawnnaah nimin khan he thu hi home minister chuan a sawi a. CYMA-in SRS dina ruihhlo do beihpui an thlak chuan ruihhlo do kawngah police, excise leh Assam Rifles te a pui niin a sawi.
Home minister chuan kohhran leh pawl hrang hrangten mahni hma zawn theuhah ruihhlo dova nasa taka hma an lak thu pawh sawiin, heng hmalaknate hi tun aia nasa zawka kalpui a tul thu a sawi.
“Ruihhlo leh damdawi hman sual hi mi mal maiin an tuar lo va; chhungkua, khawtlang leh ramin kan tuar a ni tih kan hriat nawn leh ka duh,” tiin, “Mizorama chhungkaw zahve aia tamin ruihhlo avangin kan tuar a ni,” a ti.
Assam Rifles-te chu ram venhim leh ruihlo do bakah kawng hrang hranga vantlang tana an luang chhuak thin pawh chhunzawm zel turin home minister chuan a chah a. Zirlai naupangte reng reng chu ruihhlo laka inthiarfihlim tlat tur leh tichhin reng reng lo turin a chah bawk.
23 Sector Assam Rifles hotupa, Brig. Digvijay Singh pawhin Mizoram chu khawvela ruihhlo hmunpui tia sawi, Golden Triangle hnaiha awm a nih avangin a tuar nasa nia sawiin, mihring cheng zat ngaituahin ruihhlo ngai an tam tih sawiin, ruihhlo do kawngah nasa taka hmalak a tul thu a sawi.
Assam Rifles-in ni tin deuhthaw ruihhlo an man thin thu sawiin, “Demand a awm chhung chuan supply a awm reng dawn a; chuvangin, chhungkua a pawimawh a, ruihhlo ti lo tura chhung tin inzirtir a ngai hle,” a ti.
Mizoram Police-in an chhinchhiah danin kuminah May thla tawp thleng khan heroin kg 8.624; ganja kg 35.335 leh Methamphetamine kg 39.689 an man tawh a, henga inhnamhnawih mi 107 manin, thubuai 79 ziah luh a ni tawh.
Excise & Narcotics department-in kuminah May 15 thleng khan heroin kg 10.081; ganja kg 68.850 leh Methamphetamine kg 30.739 an man tawh a, henga inhnamhnawih mi 267 man tawhin, NDPS Act 1985 hnuaiah thubuai 193 an ziak lut tawh.
Nikum khan ruihlo vanga nunna chân 47 awmin, kuminah May 15 thleng khan ruihhlo vanga nunna chân mi pasarih an awm tawh niin an chhinchhiah bawk.
SRS in rawng taka ruihhlo an do ang kha chu awm lul tawh lo rawh se. Kan ramhruaitute pawh hi an mak chu ka ti ngawt mai – vigilantism support ang deuh a an tawng chhuak thin hi. Mi lawm zawng sawi ringawt hi a ni lo tihte hi hriat a hun tawh. HM berin “Kan force-te hian tan an lak leh zual a ngai,” ti lova hmingchhe taka che thin SRS kan mamawh a ti hian kan sawrkar nep ziate hi a pholangin ka hria