Mizo thalaiten zirna tha leh hna hmuh nan pawha an lo chhawr tangkai tawh, Edu Fest ‘22 chu nimin khan MJA Gen. Hqrs. President C Lalrambuatsaiha’n Millennium Centre chung zawlah a hawng.
Hawnna inkhawmah thu sawiin MJA president hian, “Ei zawng turin thiamna kan mamawh a, thiamna nei lo ai chuan a neiin an thawh hlawk thin. Mizoramah thiam zir tur hian tawp chin a nei fo a. Chuvangin, thiamna sang zawk nei turin ram pawn pan a ngai thin a. Tunah kawtkai maia ban phak turin zirna in hrang hrangte an rawn inpho chhuak hi a lawmawm hle a ni,” a ti.
MJA president hian Mizoram chu natural resources-ah a hausak loh avangin thiamna bik nei ‘skill labour’ a mamawh tih a sawi a. “Kan ram hian human resources a nei a, heng skill labour-te hi state pawnah kan thawn chhuak thei a. Chumi atan chuan kan thalaite kan zirtir a ngai a ni,” tiin, Edu Fest 2022 chu a tam thei ang berin chhawr tangkai se a duh tih a sawi.
Kum 20-na hmang mek Edu Fest buatsaihtute chuan an tum ber chu zilaiten hmachhanah ngei career option awm theih dan free counselling pek leh phai college-a zirna dap mekte tan zirna in (university/college)-a thawkte ngei, a kara mi dang tlazep loa hmaichhana indawrtir a nih thu an sawi.
Kumin Edu Fest-ah hian UGC/AICTE-in a pawmpui zirna in hrang hrang – paramedical course, nursing, pharmacy, engineering civil, petroleum, computer science, agriculture, humanities, allied science, graphic designing, medical, engineering, management, science, commerce leh stream dang dangte an inchhawp chhuak a. College thenkhat phei chuan scholarship an pek theih bakah tlang mite tan tuition fee an titlawm thei bawk.
Edu Fest ‘22-ah hian Amity University, Sharda University, Insitute of Engineering & Management, Kolkata; RR Group of Institution, Bangalore; PEWS Group of Institutions; MU University, Noida; Acharya Institute, Bangalore; Assam Dowtown University; Parul University, Gujarat; MATS University Raipur leh Graphic Era, Uttarakhand-te an tel a ni.
Zalen chanchinbu leh Lynchpin buatsaih Edu Fest ‘22 hi vawiin chhun dar 11 atanga tlai dar 5 thleng tlawh theih a ni ang.