India-a rorel lai party hruaitu langsar pahnihin Prophet Muhammad-a chungchang an sawina chuan nghawng a nei zau zel a. Sorkarin ram dang nena inpalai tawnna thil leh inkungkaihna thlengin nghawng tha lo a neih a hlauhawm ta hle.
UAE, Oman, Indonesia, Iraq, Maldives, Jordan, Libya leh Bahrain ramte chu Islam ram zinga he thu sawi demna tichhuak tawh an ni a. A hmain Kuwait, Iran leh Qatar ramte chuan an ram theuhva India palai kovin an lungawi lo hle tih an hrilh a; Saudi Arabia ram phei chuan tawngkam na tak thu a chhak chhuak.
India palaite chuan lungawi lo ramte hi thawi dam tumin hma an la ngial a; mahse, tuna a lan dan maiah chuan chuti maia tihlungawi theih an nih hmel loh.
Muslim ramte lungawi lohna bulpui ber hi Hindu nationalist BJP thupuangtu pakhat, Nupur Sharma-i thu sawi vang a ni a. Thla hmasaa TV-a thil sawihonaah Prophet sawihnawm zawngin thu a sawi a, a hnuah a video hi a darh leh ta si a. Delhi bika BJP media hotu, Naveen Jindal-a chuan a hnuah Twitter-ah Muslim-te huat zawng tak thu a tar lang zui leh bawk.
Sawiseltute chuan Sharma-i leh Jindal-a thil sawite hian India rama tun hnaia sakhaw pakhat chawi vawng tumna awm nia sawi chu a tak ngei a ni tih a nemnghet niin an sawi a. Kum 2014-a BJP-in thuneihna an chan atang khan India-ah hian Muslim huatna lam leh beihna ang zawnga thil thleng a tam sawt a ni.
Sharma-i thil sawi bik phei chuan India rama sakhaw zuitu tlem zawk, Muslim-te a tithinrim hle a, state thenkhatah chuan duh lohna lantir hial a ni.
Hruaitu pahnihte hian vantlang hriatah ngaihdam an dil ve ve tawh a, an party pawhin Sharma-i hi a nihna atanga chawlh lailawktirin Jindal-a chu an hnawt chhuak bawk.
“BJP chuan mi tute emaw sakhua sawi nepsakna hi a pawm thei lo hulhual a. Hnam bil emaw, sakhua emaw rin dan leh tih dan hmuhsit leh deusawh hi BJP duh dan a ni lo va, hetiang tihna ang chi leh a titu pawh tih lansarh a duh lo,” tiin thu an chhuah.
Mi thiamte chuan BJP hian hma la ve ngial mah se a tawk zo dawn lo niin an ngai a, ram chhungah mai tawp lovin ram dang nena inkungkaihna khawih thil a ni dawn niin an sawi a. Islam ramten thu an chhuah tawhah an mite an thinrim hle tih a lang niin an ngai.
Qatar chuan India hian vantlang hmaah ngaihdam a dil ngei an beisei tih an sawi.
“Islam sakhaw hlauhna tur lam thil sawia hremna pek loh chu mihring dikna chanvo atan hlauhawm a ni a, nakin zelah chuan a aia nasa zawk thlengin tharum thawhna leh inhuatna thlen thei a ni,” tiin Qatar ram foreign affairs ministry chuan thu a chhuah.
Saudi Arabia thuchhuah pawh a rum hle a. “Ministry of Foreign Affairs chuan BJP thupuangtu thu sawi hi a demin a duh lo tak zet a ni,” a ti.
Qatar-a India palai, Deepak Mittal chuan mi thenkhatin tawngkam dengkhawng tak an sawi chhuahte chu India sorkar thil thlir dan a ni kher lo niin a sawi a. BJP hruaitu hlun leh ram danga palaite pawhin thu sawi chu an dem thu an sawi hlawm.
Member 57 awmna, Organisation of the Islamic Conference (OIC) leh Pakistan pawhin India hi a sawisel bawk.
Mi thiamte chuan BJP hruaitu lawk leh sorkar hotu lianten vantlang hriat tur thu an chhuah thuai an ring a. An ti lo a nih chuan Arab ram leh Iran nena an inkar tikhi thei a nih an ring.