India leh Gulf Cooperation Council (GCC) insumdawn tawnna hlut zawng hi kum 2020-21 khan $ tluklehdingawn 87 zet a tling a. GCC-ah hian Kuwait, Qatar, Saudi Arabia, Bahrain, Oman leh UAE, stood pawh an tel.
Heng ramah hian Indian maktaduai chuang cheng leh hnathawk an awm a, an thawh chhuah sum maktaduai tel chu India-ah a lut bawk a. Heng ram tho hi India-in energy a lak luhna ber an ni bawk.
Indian Prime Minister Narendra Modi pawhin heng lai ramte hi kum 2014-a thuneihna a chan hnuah a tlawh awl lo va. UAE nen bik hian zalen zawka an insumdawn tawn theihna tur inremna a siampui tawh a, zau zawka an indawr zel theih nan GCC pawh hi a be mek bawk.
Modi-a hian kum 2018-a Abu Dhabi-a Hindu temple hmasa ber tur dinna tur lung phum pawh a hmanpui nghe nghe a, he mi tum hian temple din tur chu India leh heng laia awm ramte inkungkaihna thatzia lantirna a nih thu a sawi nghe nghe.
Tun tum thil thlengah hian UAE hian aw a la chhuah na ve lem lo va. Ram pahnihte inkar hi tun hnai kum eng emaw ti liam ta atang khan a tha hle a, UAE hian ram dang nena thawhhona pawl ang chi-ah pawh India lam a tang deuh zel.
Mi thiamte erawh chuan tuna Islam huat zawng thu sawi avang hian India leh UAE inkar leh ram dangte nena an inkar hi hniam mai thei dinhmunah a ding niin an ngai.
Delhi leh Tehran inkar hi kum eng emaw zat chhung chu tha tak a ni ngai lo va; mahse, tun hnaiah Iranian Foreign Minister Hossein Amir Abdollahian chuan India a tlawh dawn a, hei hian a tihthat deuh theih beisei mek a ni.
India palai nia Arab rama lo awm kual nual tawh, Anil Trigunayat chuan India chu dinhmun khirh takah a ding mek niin a sawi a, a pawimawh ber chu hruaitute chu a tha lo zawk thleng thei venga an chet chhuah thuai a nih thu a sawi.
Arab rama chengte hi an thinrim em avangin an hruaituten an thunun thei dawn em tih ngaihchan mek a ni a. Social media-ah India sawiselna hashtag chu heng ramah hian a lar hle mek.
Hashtags an hman thenkhatah chuan India thil siam boycott duhna pawh a tel a. Qatar leh Kuwait-ah chuan dara India siam pho chhuahte pawh lak thlak a ni a. Kuwait-a Al-Ardiya Co-Operative Society supermarket chuan Arabic-in, “Indian thil siam kan la bo,” tiin an tar lang.