Tripura chief minister hlui, tuna eptu leader ni mek, Manik Sarkar-a’n Sonamura, Sepahijala district-a hun a hmannaah Thawhtanni khan BJP leh Communist Party of India (Marxist) CPM worker-te tum hnih intibuaiin mi parukin hliam an tuar niin police-ten an sawi a. Hliam zinga mi pali hi rorel lai, BJP mite an ni.
Buaina chhuahna hmasa zawk hi Sarkar-a hova CPM MLA pahnih, Shahid Chowdhury leh Shyamal Chakraborty bakah anmahni thlawptuten hun an hmanna tur, Kathalia pana an kawng kawngah, BJP miten Dhanpur bazar bula an lo dannaah a ni.
Pawl pahniha mite hi nasa takin an intibuai a, BJP worker pakhatin hliam an tuar niin police chuan an sawi.
Intihbuai vawi hnihna hi Bashpukur-ah a ni a, Dhanpur atanga km thum dawna hla a ni a. Sarkar-an kea pana a thlen hnuah niin police-in kir mai tura an ngenna zawm duh lovin CPM miten vengin ke hian a pan a ni.
An intihbuaina hnuhnung zawkah hian CPM mi pakhat leh BJP worker paliin hliam an tuar a. Police chuan a hnawh darh nan mittui tlakna hmangin an phuh a ni.
“Boruak sa zual chu tihdaih a ni tawh a, buaina dang a chhuak zui lo,” tiin police headquarters-a officer pakhat chuan a sawi.
Sarkar-a hian vantlang inkhawm a neih zuinaah an party mite leh thlawptute chu politics avanga tharum thawhna thleng nasa lutuk do turin a ti.
BJP hian Nilaini hian Kathalia bazarah CPM-te tharum thawhna an chetna duh lohna hi lantir an tum bawk.
“Tharum thawhna hi keini chuan kan duh lo va, kan ti ve ngai lo. Hetiang a nih avang hian kan mite hi chak lo zawka an ngai hi an tidik lo hle a ni. Anniin min beihna anga bei let ve tur hian kan inpeih reng a ni,” tiin Youth Affairs minister Sushanta Chowdhury chuan a sawi.