France in player enchhin nan Croatia nena an inkhel an hmang a. An inthlak kual hi khelmualah a nghawng langin Croatia in 1-1 in an chelh.
Nations League champion lai hi ni li kalta khan Denmark lakah an tlawm tawh a. Tun tumah hian Adrien Rabiot goal khung chu an chakpui mai dawn nia a lan laiin Croatia in penalty atangin huntawp dawn lamah si phurh an sut.
France an inenchhin
Split khua a Stadion Poljud a inkhelah hian France in an star player-te an chawlh hahdam tir a. Kar hmasa a Denmark laka tlawm team atangin player 10 an thlak.
Muallaiah Matteo Gueandouzi leh tunlaia ngaihven hlawh, Real Madrid pan tura ngaih Aurélien Tchouaméni te an din tir a. An hmaah RB Leipzig a che tha Christopher Nkunku awm.
Tlarhmaah Monaco rinrawl Wissam Ben Yedder chu Moussa Diaby in dinglam atang a thlawp a, Adrien Rabiot-a’n mualsir atangin midfield hnawh tawt a tum ve thung.
Team thar, la khel ho tam lo an nih avangin a tirah Croatia an kheltha zawk a. Mahse France tan Nkunku chuan goal a khung a, offside avanga pawm a ni lo thung.
Inkhel a kal rei zelah erawh France an kheltha zawk thung a. Moussa Diaby a hnawk a, a laiah Tchouameni a langsar.
Minute 52-naah an thawhrah an seng a, Ben Yedder-a ‘through ball’ pek chu Rabiot chuan la in ram tana a vawi hnih nan goal a khung.
Mahse minute 83-naah France substitute Jonathan Clauss chuan Andrej Kramaric a ti tlu a, penalty chawiin Kramaric-a’n Mike Maignan-a goal-ah a khung.
Kramaric hian chakna goal a khung teuh a, mahse Maignan-a’n a lo save sak a, point khat ve ve an insem.
“World Cup kan thlir”
France coach Didier Deschamps chuan, “Kan result a lungawi thlak vek lova, kan inkhel hmachhawn kha a awlsam lo. Kan thlir ber chu kumtawp a World Cup a ni.” a ti a.
“Kan inthlak kual viau chungin kan kheltha. Hma kan hruai a, goal khung belh thei kan ni bawk. An si phurh kan sut tir kha a pawi ta bawk a ni.” tiin inkhel a thlirlet a.
“Team thar hlak ang kan khelhtir chung pawhin khelmual chhungah kan inman a, kan thawhhona a tha.” a ti bawk.