Aizawl faina leh Tlawng humhalh turin AMC leh YMA

Aizawl khawpui faina leh Tlawng lui humhalh kawngah thawk ho turin Aizawl Municial Corporation (AMC) leh Central Young Mizo Association (CYMA) ten a thuphungin thawhho an remti a, hmalak dan tur erawh an la duang dawn a ni.

Thawhlehni khan Aizawl Mayor Lalrinenga Sailo pisaah AMC leh CYMA hruaituten thawhho chungchang ngaihtuahin an thukhawm a. Aizawl khawpui leh a chhehvela leivung paihin mipui tui tlan ber, Tlawng lui a tihbawlhhlawh nasat avangin khuahkhirh a nih theihna tura hmalak dan turte leh a hmun loa bawlhhlawh paih tihtawp dan tur an sawi ho a ni.

He thukhawmah hian working committee din nghalin committee-ah hian AMC aiawhin mi 10 ruat an ni a; CYMA aiawh mi paruk an inruat bawk.

Thutkhawmah hian AMC atangin R. Thanglura, Dy. Mayor; Zothanmawia, Municipal Commissioner; Lalringliana, Executive Councillor; Laltlanzova Khiangte, Executive Councillor; H. Zonunsanga, Executive Councillor leh official dangte an tel a. CYMA chu an President R. Lalngheta hoin, Prof. Lalnuntluanga, General Secretary leh member dangte an tel a ni.

Hemi chungchangah Laltlanzova Khiangte, Executive Councillor, AMC chuan Aizawl khawpui chhungah bawlhhlawh paih motor ni tin 150 vel tlan reng chungin tui luan kawra bawlhhlawh paih an la tam tih a sawi a. Hei bakah Aizawl khawpui tui tlan ber, Tlawng lui ei tlak loa a chhuah mai loh nan a tibaltu leh tihnawktute CYMA nen tangkawpa then fai hna thawhho zel an tum tih sawiin, “Vawilehkhata hmalak nghal hluai theih ni lo mah se committee dinin theihtawp chhuahho zel tha kan ti a. Aizawl khawpui tan CYMA leh AMC kan thawkho thei tur hi kan lawm khawp mai,” a ti.

Working Committee:

AMC aiawh turin:

1. Laltlanzova Khiangte, Executive Councillor, AMC
2. H. Lalhmingthanga, Joint Municipal Commissioner
3. John Zosangliana Ralte, Councillor
4. Lalfakzuala Chenkual, Councillor
5. David Zohmangaiha, Councillor
6. Vanlalneia, Councillor
7. Chuauzikpuii, Councillor
8. R. Lalawmpuii, Councillor
9. Christina Roluahpuii Sailo, Councillor
10. C. Lalmuanawma, Town Planner

Central YMA aiawh turin:

1. Prof. Lalnuntluanga
2. Prof. Malsawmliana
3. JH Vanlalhuma
4. Lalchhuanmawia
5. V. Malrosanga
6. Zosanglura