Spain midfielder Saul Niguez chuan Chelsea a loan a season liamta a hman hnuah a nghetin a zawm dawn lova, a contract neitu Atletico Madrid hnenah a kir.
Kum 27 mi hian nipui lai khan Thomas Tuchel-a pawlte hi a zawm a, mahse an tan Premier League game 10 chauh a khel.
England-ah a che tha tawk lova, nitin nun bakah football an khelhdan inang lo chuan a tan harsatna a siam tih a zep lo. “He zinkawng a ka bul tan dan hi sawifiah ka duh a, ka beisei angin thil a kal lo. Hunrei tak chhung ka pian leh seilennaah hun ka hmang a, chuvangin vawi leh khat a engkim inthlak vek hi thil awlsam a ni lo.” tiin a sawi.
Stamford Bridge a pan hma hian Atletico Madrid tan league-ah vawi 33 inkhel in hemi season-ah hian La Liga title a chawipui a. Chelsea-ah erawh loan a hun a hman chhungin inelna hrang hrangah vawi 23 chauh a inkhel a, Premier League bikah vawi nga chiah inkhel bul a tan.
“Bul tan lam harsa mahse zawi zawiin engkimin ziaawm lam a pan ve zel a. Hringnun hi chu hmasawnna leh inzirna tur a ni a, hei hi helaia ka hun hman chhung hian ka hre chiang hle.”
“He club-ah hian mikhual taka hun ka hman lohna tura ka tana hna an thawh zawng zawngna chungah lawmthu ka sawi.” tiin a sawi belh bawk.
Saul hi Chelsea in Euro maktaduai 35 a lei ngheh theihna an nei a, hei hi an hman loh tur an tichiang tawh. Spain-ah kir lehin amah ngaihventu club an awm nual a, a hma hun a tichiang thuai turah an ngai.