Germany-a Berlin khawpui kawtthler lun laia car khalh luhin mi a sut chiamnaah mi pakhat a thi a, eng emaw zatin hliam an tuar bawk.
Emergency thuneitute chuan thil thlen dan kimchang an la hre thei lo va, an ram sanaa Nilaini chawhma dar 10:30 (India-a chawhnu dar 2:00) vela thleng niin chetsual palh nge tihluih tih hriat a la ni lo.
Police thupuangtu chuan a khalhtu hi an man nghal tih a sawi.
A thlenna hmun hi Berlin khawpui thlang lam laili, dawr tamna kawtthlerah a ni.
“Hliam tuar zingah hian na tak tak pawh an awm,” tiin police thupuangtu, Theo Cablitz chuan a sawi.
Car hi kawtthlerah hian chak taka tlanin mihring kalnaah a lawn kai a, dawr pakhat kawtah a tlan lut zui niin an sawi.
Thlalak thehdarhah chuan Renault Clio silver rawng chu incheina bawlhlo zawrhna dawr chhungah a inkhawh lut tih a lang a. Ruang ni awm tak, puana khuh pawh kawng laiah a lang bawk.
Berlin police service chuan emergency worker 130 vel a hmunah hian an awm thu a sawi.
Berlin Mayor Franziska Giffey chuan Twitter-ah thil thleng tuartute pawi a tihpui tak zet tih a tar lang a, police-in chiang zawkin an chhui mek tih a tar lang bawk.
“Emergency service mi leh sa 130 chuang zet rang taka a hmun an thleng leh a tuartute an buaipui thei nghal kha a lawmawm hle a ni,” a ti.
Lemchan thiam, a bul hnai lawka lo awm, John Barrowman chuan Twitter-a video a dahah car hi dawr hmaa a inkhawh luh hma hian mihring kalna lai bikah hian lawn tumin vawi khat mai ni lo a bei tih a lang.
“Police an lo che nghal a, a hmun an thian a. Helicopter-in hliam tuar an phur chhuak nghal bawk,” a ti.
Thil thlenna hmun hi hmun lun tak, Berlin khawthlang lama Rankestrasse leh Tauentzienstrasse kawtthler intawhna lai a ni.
Breitscheidplatz ep chiah a ni a, he hmun hi Krismas bazarpui hawn laia truck pakhatin mi a pawng sut chiama mi 12 an thihna hmun kha a ni.
Breitscheidplatz-a thil thleng hi IS chuan an tihah an chhal a, truck khalhtu hi a hnuah Italian police-in an kap hlum zui a ni.