India ramah coronavirus kai hmuh an pung leh hret hret a, darkar 24 liam ta chhung pawh khan mi 5,233 zet hmuh niin a hma ni aiin 41% laiin an tam zawk a, state thenkhatah an pung chak leh mek.
Ni 93 zet hnuah India-ah hian ni khata hri kai hmuhin mi 5,000 an tling leh ta a, enkawl lai pawh a pung zawnga kal zelin mi 28,857 an tling leh tawh niin union health ministry chuan a chhinchhiah.
Darkar 24 liam ta chhung hian mi pasarihin Covid hi thihpui leh hmanin mi 5,24,715-in an thihpui tawh a. Mi vaibelchhe 4.31 chuangin an kai tawh a ni.
Hri kai pun chak thar leh mekna chu Maharashtra niin darkar 24 liam ta chhungin mi 1,881 zetin an kai tih hmuh a ni a, a hma ni aiin 81% zeta tamin February 18 hnua ni khata a kai hmuh tam ber ni a ni.
Khawthlang lam state-ah hian B.A.5 variant an tih kai pakhat hmuh a ni bawk tih state health department chuan a sawi bawk.
An khawpui ber, Mumbai-ah ringawt mi 1,242-in hri hi an kai tih hmuh thar niin a hma nia mi let dawt a ni.
Darkar 24 liam ta chhunga India rama sample endik zawng zawng zinga 1.67% chuan hri hi an kai tih hmuh chhuah a ni a, chawlhkar khat liam ta chhunga endik zinga 1.12%-in an kai bawk.