Ruihhlo leh a kaihhnawih do turin ke pen a hun
Ruihhlo leh sualna a pung zel a, ruihhlo a hluar miau avang hian a khawihtu pawh an pung nasa leh tawh hle. Mi fel leh thate an him lo a, ruk ruk leh pawisak neih lohna a tam telh telh bawk. Hei hi veiawm tak a ni.
Hetiang hi kan dinhmun a ni tawh a, a theih ang anga hmalak nasat a nih loh chuan kan ram hi a ralmuang lo telh telh an tih pawh hlauhawm tak a ni.
Home Minister Lalchamliana chuan SRS hun laia ruihhlo an do anga do leh chu Mizoramin a mamawh niin tunhnai mai khan a sawi a. CYMA chu ruihhlo do kawnga thapui thawhtu nia sawiin, “Kum eng emaw zat kal taa SRS dina ruihhlo an do anga do leh kha kan ramin a mamawh hle niin ka hria,” a ti chhuak hial.
Ni e, a hmalak theihna zawna khauh leh khawng taka tute pawhin hma kan lak hi a tul a, inpuhchhe tawn mai lo leh insel’ tawn mai lova thapui thawha ruihhlo leh a kaihhnawih do tura ke kan pen hi a hun tawh hle a ni.
Home minister sawi dan phei chuan, “Ruihhlo leh damdawi hman sual hi mi mal maiin an tuar lo va; chhungkua, khawtlang leh ramin kan tuar a ni tih kan hriat nawn leh ka duh,” tiin, “Mizorama chhungkaw zahve aia tamin ruihhlo avangin kan tuar a ni,” a ti a, rapthlak zawk tak a ni. Heti tak maia kan ram min runtu ruihhlo leh a kaihhnawih do tur hian chet la thar ila, ram ralmuang leh nuam siam zel i tum zawk teh ang u.