Tuna i hrawn tura hi sual leh tikher kher angin mi sawi i hria a nih paw’n Nu danglam tak a ni tih erawh i hai lovang. A chhan chu, tuna i pasal enkawl seiliantu ni miau hek! Pasala nu te nena inlaichinna neih that hi a pawimawh hle a, i pasal pawhin in inkar boruak that zia te a hria anga, fate pawhin an pi leh pute zahna chang an hre mai dawn a ni.
Thinlung taka Pasal te nu- “Ka nu” han tih hi thil awlsam a ni ngai lo. Tuna i pasal nena in inzui lai a, engem a tawngkam duhawm lo leh ril ru khei zak tur a sawi chhuah phei chuan hmeichhe awmnem zawk hian a pai dam thei lova, chumi hre ran chunga pasal te In chhunga han invawm luh chu a huaisen thlak letling!
Hei vanga pasal te bak hmangaih tum lo bur an awm phah reng ni. Engpawhnise, hei hi thil tha ber a ni lova, nu te nena inkar fel hi taksa leh thlarau tan a tha a, heng a hnuaia tarlante hi zawm la, mo fel tak i ni mai ang.
Zahthiam rawh: Tuna i hrawn mek i nu hian a hringnunah daihriat tam tak a lo nei tawh a. Engkimah i lungrual pui thei lo na-in, i zahthiamna i lantir erawh a phu ngawih ngawih a, chu chu a takin a hre tur a ni bawk. A fapa (i pasal) nau pan tet atanga chawm a, enkawl puitling tu a nihnaah h ian nangmahah pawh engemaw ti taka thuneihna rawn neih a tum a ni thei. Hetiangah hi chuan lo inlak sek a, tanhmun lo sawhngheh a, beih let chiam chi a ni lova. A thuneihna leh a huhang hi hriatthiam pui la, a phu ngawi ngawih thilah chuan inrawlh tum suh ang che.
Tangkai tak nih tum rawh: Engtiang khawpa thil harsa leh hrehawm pawh nise, tha tho taka i tih a, i thawha hi i nu hian tawk a ti viau tho. Mi tangkai tak i nihna i lantira hi mi fel i nihna phochhuahna kawng chikhat a ni. A kal duhnaah te hruai la, thlah thin la, kal pui rawh. In leh a vel chei leh tihthatnaah te tanpui la, engmah a lak atangin beisei let suh. I thawhrimna te, i tangkaina te, i taimaknate hian i nu a tilawm anga, a rualpuite bulah insawi theihnan tak a hmang dawn a, chu chu atan a pawina a awm reng reng lo.
Inpawhna leh inlaichinna tha zawk: Pasal nu te’na lungawilohna leh vuivaina tur an neih lian bera chu – ‘Tangkai tawh lo leh pawimawh tawh loa inhriatna’ hi a ni. Ngaihtuah chiang leh teh. I pianna nu i be fova, tuna i pasal-a nu kha vawi engzat nge i biak? Tuna i nu nena inlaichinna tha tak neih i duh chua n i nun-a a rawn tel ve i remti tur a ni ang. Thil hote anga langte pawh hi hlim takin sawipui la, titi pui la, tuna chhungkaw thar in dinnaah hian a mikhual lo a ni tih a hriat meuh chuan nuam i ti letling zawk ang.
Nangmah vangin inchhuang rawh se: Engang pawhin chapoin induh mah la, i nu nena in inkar hi a fel loh chhung chuan nuam i ti chuang lovang. Chuti a nih chuan amah nena inkar hi a fel ngei a tul dawn a. A kawm châk leh thian atana a it em em i ni tur tihna a ni ang.Thil hote te-ah vuivaina zawng lo la, i pasal bulah pawh a chanchin tha lo leh mawi lo hi hrilh suh. Phun phun lovin engemaw pawimawh sawi a ngai a nih pawhin zahawm takin hrilh mai la, a bak sawi zui emaw chhut zui tum ngai suh. I nu kha nangmah vangin a inchhuang nge hrehawm a ti zawk?
A fapa hi duat hle rawh: Hei hi i ngaihtuah ngai em? Tuna i nu hian i pasal hi a pian phat atang khan a enkawl chhoa, a duat em em a, a theih ang tawk tawkin a tuam hlawm a. Mi tihnat a phal lova, an sawi chhiat emaw an rel phar pawh a duh hek lo.
A fapa hian hmangaihna a tam thei ang ber dawng se, duattu nei se, ngaihsak em emtu nei bawk se tih hi a duhthusam a ni. I pasal hi an hmuh phak loah mai ni lova, an hmuh phakah pawh duat takin en kawl la, thu mai ni lova a taka i lantir phawt chuan boruak a dang zar mai ang.