- Reuben Lalnunthara Hnamte
Kum zabi 20 na vela thil lo thleng tur KRISTA TEL LOVA KRISTIANNA tih thu Sipai Pawl hmuchhuaktu William Boothan a lo sawi hi mak tak maiin a thleng dik mek niin a lang a. Kan ram ngeiah pawh he thu hi a dik a ni tih kan hmu a ni. Heti hian a hriat nuam zawngin lo dah ta ila: KRISTA TEL LO RINGTU NUN ti ila kan hrethiam zawk awm e. Mizoramah chuan mizo tawh phawt chu Kristian,ringtu niin kan inchhal vek a, piangthar tawh niin kan inchhal vek bawk. Amaherawhchu kan nundan leh awmdanah erawh Krista hmel hmuh tur a tlem hle si a nih hi. A tu te pawh mai hian kan ringtu nun hi kanin duhkhawp lova, ringtu tiha mawilo tiin kan in sawisel deuh reng a, chutih rualin a sawiseltu thenkhatte pawh eng chu an ni chuang hlei lova. Kan ram Kristian ram nena inhmeh lem lo ka hriat te tlem lo tarlang ve leh teh ang.
Eirukna(Corruption) : Keini ringtu in ti ram angah hi chuan eirukna kan tih hi sawi ngai awm lo tak pawh a ni zawk a. Chutih rualin Thuhriltu te’n an sawi tamber chu kan rama eirukna nasa lutuk tih hi a ni. Eiru ni a kan sawi leh kan ngaihmawh em em rual hian, a eirute kan thik nge, eirukna kha kan do tak tak tih hi zirchian ngai tak chu a ni. Hetia kan sawi kan sawi rual hian a sawitu tamzawk hi chu a eiruk theihna hmun ah awm ta se fihlim chuanglo tur hi kan ni nawk awm a sin. A eiru ni a kan puh leh kan hriat tam berte hi chu ringtu ni a inchhal tho, Kohhranah pawh in hmang tak an ni tho si a.Chuti a nih si chuan eirukna hi kan do tak tak ngamlo tihna em ni ang?
Pathian tel lo politics : Kan ram politics khelh danah hian Pathian a tel lo ti ta ila min haw fe fe chu an awm ngei ang. William Bootha chuan he thu hi a lo sawilawk diam a ni. Politics hi a pawimawh em em a, a tel lovin ram a hruai theih loh tluk a ni a. Khawvela kan awm chhung chuan ramtinah hmun pawimawh ber a chang reng dawn a ni. Amaherawhchu kan politics khelh dan erawh hi chu in enchian kan mamawh hle niin ka hria. Thuthlunghlui hunah khan Pathianin Israelte rorelsak tur lal kha a ruat thin tih kan hria a. Lal Saula ngei pawh Pathianin a ruat a ni a. Mahse Pathian a hawisan avangin Pathian pawhin hawisan ve in tihhlum a ni ta a nih kha.Kristian ram ni lem lo ah te hi chuan an ram rorelnate hi chu lo bawlhhlawhin, lo tha lo deuh pawh ni se an hriatthiam awm. Mahse, keini Mizoram ringtu tamna leh kristian ram a inchhal ramah te hi chuan Pathian tel lo Politics hi chu a inhmeh ve thlawt lo a ni.
A nihna takah hi chuan politics hi chu ram mipuite hamthatna ngaihtuah a, ram siamthatu tur, mahni hlawkna pawh ngaituah chang lova,ram mipuite hlawkna leh malsawmna tur ngaihtuah a, dik taka rorelna kengkawh tur ni awm tak hi a ni. Ka hmuh danah chuan Pathian rawngbawlna pawimawh lutuk niin ka hmu a ni. Mahse tuna a landanah hi chuan ringtu tak tak tan chuan tel ve lohna chi a ni mai em? tih hi zawhna pawimawh tak a ni. Isua telve theihna ngei politics hi kan kalpui a pawimawh, kan ram hruaina hi a dik a, a thianghlim chuan State dang ringlo mite tan pawh a entawn tlak kan ni ang. Mizoram chu a sawi a sawi ngawt nilovin a taka ringlo mite tana missionary ropui tak kan ni dawn a ni.
He ta kan sawi tum tak chu ringtu ni a inchhal ve tho si, khawvel nena chawhpawlh pawi ti map lo; thlaruavin a chenchilh bawk si loh hi kan kat nawk awm a sin. Mahni hlawkna tur a nih dawn chuan dawtsawi hreh map lo, thianghlimlo taka sum hmuh pawh hreh chuang lo, mahni nawmsakna tur leh hlawkna turah chuan pamham em em si te kan awm thin hian kan Christianna(Ringtu nun) hi a ti dal em em a ni. Chutih laiin Politician zingah te, ram hruaitu ah te leh sorkar hna thawkte leh a dangah te pawh mi dik tak tak; sum thianghlimlo laka insum leh mi te’n a an tih pawh hreh hauh lova dikna tan tu, ringtu nghet tak an awm thin hian Pathian hi an va chawimawi thin si em!
Vawikhat chu NEICCYA Assembly nei a Shillong bul mai Khasi Kohhran lian tak pakhata kan kal tumin; an Kohhran ah chuan Khuang emaw, music Instrument reng reng lakluh an awih lova, mizo ho chuan a ho kan han ti khawp mai a. Khasi te khu an Kristianna kum 200 chuang a ni tawh a, tunah chuan harhna pawh khuan a nuai ta meuh lo a ang khawp mai. Kristianna kan tih te khu mi tamtakah chuan a hming mai a ang ta khawp mai. Keini Mizoram te chu Lalpa zawnchhuah in ti ngam ngat kan ni a. Chutiah laiin Europe leh hmundanga an Issue lian tak pakhat, Pathian awm rinlohna ( Atheism) lo hluar ta em em hi a pawi hle. Kan rama thalai lehkha thiam zingah pawh hetiang hi an awm tan tawh ni hial sawi an awm te hi ava pawi em! Kohhran tin hian harhna a lo thlen theihna tur a simna tak nena Lalpa kan auh a pawimawh hle mai. Krista tellova Kristianna tih hi chu kan ramah hi chuan thleng lul teh suh se.
Kan hriat angin tunlai khawvela Europe leh America vela an Issue lianber pakhat chu neih in ang Kohhran leh ram chhunga pawm khu a ni a. Ram thenkhat leh Kohhran tam tak pawhin an pawm tawh thu te han hriat phei hi chuan a ngaihthlak a nuam lo takzet a ni. Kan ramah ngei pawh hian a ruk chuan lo pawmpui hle te pawh kan lo awm mai thei a ni. Khawvel ramdangah te chuan lo pawm mai mai sela, keini ramah erawh chuan Krista telna ringtu nun, Kohhran, Political party leh sorkar te hi din nghet sauh sauh tura tan kan lak hi a pawimawh hle. Mizote hi ramdang leh hnamdangte thlir ah pawh Isua tana rinawm,entawn tlak (Model) ni tura kan beih sauh sauh a pawimawh hle a ni. Keini mizote chuan Kriata telova Kristianna ti diktu ni lo hram turin mitin leh Kohhrante hian Pathian i au ang u.