AIZAWL: Larsap Dr. Hari Babu Kambhampati-a’n nimin khan Kolasib district a tlawh a, DC Circuit House-ah Kolasib district thuneitute leh khawtlang hruaitute nen inkawmin, district hmasawnna tura sorkar laipui scheme kalpui dan te an sawiho.
Larsap chuan Kolasib district chhunga rel kawng siam mek leh four lane kawng siam tura ruahmanna ten inkalpawh na kawngah hmasawnna nasa tak a thlen tur thu leh Zofate tan leh state pawn mite tan pawh inlaichinna țha a thlen phah ngei a beisei thu a sawi a. Mizoram tan hmasawnna hmel thar a thlen ngei a rin thu a sawi.
Sorkar department hrang hrang te chu mipui nawlpui thleng pha hmasawnna hna ngaipawimawh tura chahin, sorkar laipuiin scheme hrang hrang a ruahman te chu mipui tana duan a nih anga mipui hnena hrilhhriat leh hamthatna mipuiin an tel ngei theihna tura mawhphurhna chu sorkar hnathawkte leh bank-a thawktute kutah thui tak a innghah thu a sawi.
Mizorama kawlphetha siam chhuahna pawimawh tak pahnih Kolasib district chhunga awm chungchang pawh sawi- in, Larsap chuan intodelh theihna leh hralh chhuah tur thlenga siam chhuah theihna Mizoramin a neih thu leh chumi tur chuan ngaihtuahna sen a țul thu a sawi bawk.
Larsap chuan nimin vek khan Counter-Insurgency and Jungle Warfare School, Vairengte pawh tlawhin, zanriah a ei a. Vawiinah Mizoram leh Assam ramria police duty-na hmun leh Vairengte khaw chhunga sorkar laipui scheme kalpuite tlawh leh tura ruahman a ni.