Colombian navy thuneitute chuan thil hlu tam tak phur Spanish lawng pil an hmuhna bul maiah lawng chhinchhiahthlak tak dang pahnih an hmu tel niin President Iván Duque chuan a sawi.
San José galleon an tih hi British-ten kum 1708-a Colombia-a Caribbean lawngchawlhna, Cartagena bula an tihpul a ni.
Rei tak zawn a nih hnuah kum 2015 khan hmuh a lo ni tawh.
He lawng hi a hlu hle a, tuipuia chhiat tawk lawngah chuan a thil phurh la hlu ber nia hriat a ni.
Remote hmanga thunun vehicle hmanga a bul vel thla an laknaah lawng ruangruh dang pahnih hi an hmu leh ta a – colonial boat leh schooner nia hriat niin heng lawngte hi San José galleon a pil lar bawr vel tho, kum 200 vel liam taa Colombia-in Spain laka indan tuma an indo lai vela mi tho kha nia ngaih a ni.
“Heng lai hmunah hian lawng chhe dang pahnih kan hmu leh a, thil hlui zir mite nen uluk zawka en mek a ni,” tiin navy commander Admiral Gabriel Pérez chuan a sawi a. “Hna hi kan tan chauh ang vel a la ni rih,” a ti bawk.
Chiang zawka thla an lak tharah chuan San José-a thil hlu phur – rangkachak leh pawisa thin te, Seville-a kum 1655-a laipui siam leh Chinese dinner service te pawh hmuh theih a ni.
Archaeologist-te chuan plate-a thu inziakte atangin khawi lam bungrua nge tih an chhui dawn tih thuneitute chuan an sawi.
He lawng neitu hi tu nge hriat a ni lo va, tun thlengin court-ah pawh thubuai la awm, inchuh reng lai a ni.
Spain chuan lawng leh a thil hlu phurhte hi chhiat a tawh lai hian sorkar thil, Spanish navy ta ni tih an sawi.