Lungleiah India zalenna kum 75 na lawmna Azadi Ka Amrit Mahotsav pualin Iconic Week hman a ni a. He hapta hi tun thla ni 12 thlenga hman tura ruahman a ni.
Iconic Week hi sorkar laipuia ministry of finance leh ministry of corporate affairs bultuma ram puma hman niin, Lunglei-ah chuan Bawrhsap Kulothungan hovin Convention Centre-ah an hmang a. Lunglei Bawrhsap chuan sorkar laipuiin mipui tana scheme a siam te loan hmanga a hlawhtlinna awm thei tura mipuite dilna hnawl lo turin bank te a chah.
Lunglei Bawrhsap chuan sorkarin mipui te hamthatna atana social security scheme a duante chawilar tur leh hmang tangkai turin mipuite pawh a sawm a. Bank dawrtute chu saving uar tura chahin, Atal pernsion yojana (APY), Pradhan mantri jeevan jyoti bima yojana (PMJJBY) leh Pradhan mantri suraksha bima yojana (PMSBY)-ah te inziaklut tam turin a chah.
Bank hrang hrang aiawh ten bank kalphung leh scheme hrang hrang chungchang bakah inbumna awm thei chungchang te Lungleia Iconic Week-ah hian an sawi a. Bank hrang hranga hnathawk tha te chawimawina hlan niin, Bank hrang hranga loan diltu mi 85 – MRB-a dil mi 30, MCAB mi 15, SBI mi 37 leh North East Small Finance Bank (NESFB) mi 3 te hnenah sanction letter hlan a ni a, zawhna leh chhanna hun an hmang bawk a ni.
Champhai-ah chuan Kahrawt YMA hall-ah Champhai Bawrhsap James Lalrinchhana hovin Iconic Week hi an hmang a. Bawrhsap chuan khaw- tlang than leh hmasawn nan banking a pawimawh thu leh bank dawr dan zira tuichilh a tul thu a sawi a. “Bank hman dan kan zir thiam a ngai a, tangkai leh hlawk zawka hman a nih theihna tura sum dahkhawla peipun kan zir thar a ngai” a ti.
“Mipui leh bank-te chu inchhawrtawn tur kan nih laia inkarhlatna lian tak kan la nei hi a veiawm” tiin, Champhai Bawrhsap chuan “Indawrtawna inpawh taka inkawmngeih tur kan ni”, a ti a. Mipuite chu bank chhawr tangkai thiam tura fuihin, sum leh pai chetvelna reng renga pawimawh tak bank pawha lenchih tur leh hamthatna awmte zawt fo thin turin a chah.
Bank hrang hrang aiawh ten bank kaihhnawih hriattur pawimawhte leh scheme hrang hrang chungchang bak ah loan chi hrang hrang dil theih dan te an sawifiah a. Bank hnathawk tha mi 8 te chawimawi niin, IDBI, MRB, HD- FC, AXIS leh Apex Bank hnuaia PMEGP, Mudra, KCC, SHG, JLG, Business, Fisher- ies leh Housing loan dil mi 13 te hnenah loan lak phalsakna sanction letter hlan a ni bawk.