Mizoram Super League champion lai lakah Mission Veng Hotshots in an chetthat an chhunzawm tluan thei lova. Inkhel quarter hnuhnung pahnihah inlehthal tirin 100-84 in Zarkawt BCA lakah an tlawm.
R.Dengthuama Indoor Stadium a Thawhlehni zan inkhel hmuhnawm takah 1st leh 2nd quarter a hmuhnawm a. Tun season a hlawhtlin tum team tha pahnihte an inchhang tawn zak zak a. 1st quarter-ah Hotshots offense a tha a, Joshua Aaron Keyes a pawimawh.
2nd quarter atang erawhin an offense a tlahniam a, Zarkawt BCA an insiamtha hret hret. Hotshots palianten defense an khelh that tawk loh a lang tan a, Zarkawt BCA in point an score thei.
Lehlamah Zarkawt BCA in inkhel tan tir lam ang lo takin inkhel a rei ah uluk zawkin defense an khel a, hei hi team pahnih danglamna a ni.
Zarkawt BCA tan Lalrina Renthei chuan point 30 leh assist vawi 6 a nei a. Joseph Frederick Allen chuan point 27 leh rebound 14 a la a. Zonunsanga’n point 22 score bawkin an offense khaidingtu an pathumin an ni.
Mission Veng Hotshots tan Joshua Aaron Keyes chuan point 42 leh rebound vawi 8 a nei a,inkhelah mimalin point a score hnem ber. Lalrozama leh Zonunsanga ten point 14 leh 12 in an thlawp ve bawk.