Aizawl: Special Judge Vanlalenmawia, MJS, Prevention of Corruption Act, chuan Saikhawthlir mi pahnih, Lalnunzira leh K Lawmawma te chu NWDPRA hnuaia tanpuina sum tihchingpen thubuaiah thiam loh chantirin, kum khat chhung tang tur leh Rs 26,000 ve ve chawi turin a hrem.
Court thuremnaa tar lan a nih danin, Raichhawkzau Watershed Committee hian National Water Shed Development Programme for Ranfed Areas (NWDPRA) atangin tanpuina Rs 14,26,321 an dawng a, tanpuina dawnga sawi te zinga mi pangnga in sum hi an dawng lo.
Tanpuina dawnga sawite hian sum an dawng anga cash book-a signature awm pawh an ziah a nih loh thu court-ah hian sawiin, C Lalnunpuia RTI zawhna an chhannah beneficiary te signature hi siam chawp a ni tih finfiah a ni bawk.
Mi pangate sum dawn tur Rs 59,000 ei ruk thubuaiah hian NWDPRA tanpuina sum sem laia Raichhawkzau Watershed Committee Chairman Lalnunzira leh Secretary K Lawmawma te chu Special Judge Vanlalenmawia chuan thiam loh chantirin, kum khat jail tang tura hremin, sum an lo ei ruk chu rulhtir an ni a, tanpuina dawngtu turte hnenah pek an ni ang.
Thiam loh chantirte mi pahnihte hi high court-a appeal-na hun siamsak an niin bail-a chhuah leh nghal an ni. He ei ruk thubuai hi ACB-in chhuiin kum 2016 khan thubuai hi ziah luh a ni a, nimin khan judge chuan thuremna puangin, thubuai hi a titawp ta a ni.