Theihtawp chhuahin AMC leh YMA thawkho se
Kan intihchangkan ve tawh ang huin kan chetziaah kan lantir lem lo a, chetfel kawngah kan ngaihsan loh zawkte kan pha lo thin hle. Mahni tui tlan pawh tura hrai duh leh bawlhhlawh paih khawmna atana hmang duh mai thin kan awm hi a pawi a, harh a hun hle.
Hetiang hi kan ram dinhmun a nih tawh avangin Aizawl khawpui enkawltu AMC leh Central YMA chuan an vei a, an thawkho dawn ta bawk. Aizawl faina leh Tlawng lui enkawl kawngah thawhho an tum a, working committee dinin, anni hian a tul angin hman an la dawn a ni.
He thawhhona ziahnaa thusawitu Laltlanzova Khiangte, Executive Councillor, AMC chuan Aizawl khawpui chhungah bawlhhlawh paih motor ni tin 150 vel a tlan reng chungin tui luan kawra bawlhhlawh paih an la tam tih a sawi a. Hei bakah Aizawl khawpui tui tlan ber, Tlawng lui ei tlak loa a chhuah mai loh nan a tibaltu leh tihnawktute CYMA nen tangkawpa then fai hna thawhho zel an tum tih sawiin, “Vawilehkhata hmalak nghal hluai theih ni lo mah se committee dinin theihtawp chhuahho zel tha kan ti a. Aizawl khawpui tan CYMA leh AMC kan thawkho thei tur hi kan lawm khawp mai,” a ti bawk.
A veiawm a, mimawl tak takte thiltih vanga kan tawrhna la thleng fo hi a pawi a, tuna AMC leh YMA thawhhona tur hian rah tha chhuah se la, khawpui faina leh kan tui tlan thianghlim zawk nan hma la thiam ngei bawk teh se.