Mizoram Youth Commission Chairman Dr. Vanlaltanpuia’n nimin khan Tuidam khuaa Sports & Youth Services department hmalaknaa sak mek Laldenga Football Ground leh Kawrthah Sports Academy te a tlawh.
MYC Chairman chuan Tuidam leh Kawthaha Sports Minister Robert Romawia Royte hmalakna fakin, “Hetiang sports infrastructure tha Mizoram hmun hniam (low lying area)-a dah a ni hian Mizo thalai infiammite tan hmasawnna nasa tak a pe ngei dawn a ni” a ti a. “Mizo infiammite hi hmunsang (high altitude) a infiam thin kan nih avangin phai khawluma inelnaah te duh angin kan ti tha thei lo fo thin a, hmunhniama training facility kan neih te hian infiammite nasa takin a pui ngei dawn a ni” a ti.
Thalaite hmakhaw ngaia hnathawktu, Mizoram hmuntina infiamna hmanraw changkang tak tak chhawpchhuaktu Sports & Youth services department leh a changtu minister te fakawm a tih thu MYC chairman chuan a sawi a. “Heng project lo pian theihna tura remtihsaktu Chief Minister Zoramthanga, Planning and Programme Implementation Department changtu ni bawk hnenah thalaite aiawhin lawmthu ka sawi” a ti bawk.