SIRD, Traffic Police, Transport department leh Mizoram Taxi Association (MTA) te tanghovin an buatsaih ni thum awh -Orientation Training for Taxi Operators/Drivers- Vanapa Hall, Aizawla neih chu nimin khan zawhfel a ni.
Training tawp ni ah hian Taxi (sticker-A) driver mi 1003 an tel a, training tan ni, tunkar Thawhtanni khan Taxi sticker-B) driver 710 te training tawhin, Thawhlehni khan Taxi (sticker–C) driver 785 te an training tawh bawk.
Taxi driver te pual training ni hnuhnungber hi Commissioner & Secretary, Transport department K.T. Beicho chuan a telpui a. Taxi driver te chu ram leh hnam rawngbawltu leh darthlalang an nih thu sawiin, ruih theih thilah an fihlim a pawimawh thu leh traffic rule te an zawm that a pawimawh thu a sawi.
Public transport te nasa zawka hman a la ngai dawn nia sawiin, taxi driver te tan chutih hun atana lo inbuatsaih chu a tul tih K.T. Beicho chuan a sawi a. Driver-te lakah passenger ten beisei an nei tih sawiin, passenger te beisei chu an tum hmun/ram thlamuang tak leh him taka thlen a nih thu leh chu mawhphurhna chu hriatreng a pawimawh thu a sawi.
A hmangtu tur te tan pawha hman chakawm tura lirthei tihfai thin pawh a pawimawh thu Transport Secretary chuan sawiin, “Keimahni leh kan thawmhnawte pawh a fai tur a ni a, kan inchei uluk tur a ni, a ti bawk.