Vawiin hi Green Mizoram Day ni mahse, Inrinni a nih avangin nimin khan Mizoram hmun hrang hrangah ‘Thing phun la, tuihna siam rawh’ tih thupuia hmangin Green Mizoram Day hman a ni a. Lunglei-ah chuan Mizoram Polytechnic campus, Hrangchalkawnah HPC Vice Chairman Lawmawma Tochhawng hova hun hmangin, thing tiak 376 an phun.
Green Mizoram Day-ah hian lawmman hrang hrang sem a ni a. Lunglei district-a kangmei veng tha ber Bualte khua niin, 2-na Chawilung S; 3-na Thenhlum an ni a. Sorkar department zinga thing phun lama ti tha ber P&E department niin, 2-na Excise & Narcotics department; 3-na PHE department an ni. NGO leh a dang te-ah District PYD (NE India) chu thing phun lama ti tha ber an ni a, 2-na NSS Unit, Govt J Buana College niin, 3-na NSS Baptist HSS leh NSS Unit, Lunglei Govt College te an ni.
Green Mizoram Day denchhena Essay inziahsiakah H. Lalrinmawiia, Sacred Heart Secondary School, Lunglei chu pakhatna niin, 2-na John Bright Vanliana, Govt High School Thingsai a ni a,
J Remsangzuali, Govt High School, Thingsai 3-na a ni.
Serchhip district chuan Thenzawl Golf Course & Resorts Convention Centre-ah District Bawrhsap Nazuk Kumar hovin Green Mizoram Day an hmang a. Golf Course chhehvelah thingphunin an hnatlang nghal.
Kangmei veng tha ber Lungpho khua niin, 2-na Zote South an ni a, 3-na Bungtlang an ni. District level committee-in Leng, Piler leh Chhingchhip Mualpui khua te hnenah lawmman a pe bawk. Chanchinbu kangmei ven chungchang ziak tha berah Lenkawl nitin chhuak chanchinbu thlan a ni.
Lawngtlaiah chuan Bawrhsap pisa tuala Green Mizoram Day an hawn hnuah Kaladan Multi Modal Transit Transport Project (KMMTTP) kawngpui sir, Lawngtlai aṭanga kilometre 9 vela hlaah inzar pharhin thing ṭiak 350 an phun.
Kangmei veng tha ber Archhuang khua niin, 2-na Siachangkawn, 3-na Vawmbuk Vaivakawn te an ni.
Champhai-ah pawh Bawrhsap James Lalrinchhana hovin Keilungliah Tuikhuah kamah thing phunin an hnatlang a. Mi 1035 thawkchhuakin Hlingsi, Char, Chawmzil, Rihnim, Bung, Lumler, Theifangbar, Zuang, Khawkherh, Lenhmui, Theivawkmit, Tei, Tuipuisuhlah, Tlaizawng, Sertawk leh Chawnpui te an phun.
Kangmei veng tha ber Bungzung khua niin, 2-na Lungphunlian; 3-na Hruaikawn an ni a. Lenrual chanchinbu chu kang mei ven kawnga thawhhlawk berah thlan a ni.
Khawzawl-ah pawh DC office complex-ah Green Mizoram Day hi an hawng a. DC Bangla hung chhungah thingphunin an hnatlang nghal.
Kangmei veng tha ber Khawzawl Darngawn veng niin, 2-na Chawngtlai khua; 3-na Chhawrtui khua an ni a. Essay inziahsak – High School level-ah C. Lalrinngheti, Khawzawl Dinthar veng pakhatna niin, 2-na Lallawmzuali Renthlei, Khualen; 3-na Lalngilneii, Khualen te an ni a. HSS & College level-ah 1-na PC. Lalremruatsaki, Pachhunga University College; 2-na Lalchhanhimi, Govt. Khawzawl College; 3-na Lalhmingmawia, Govt. Khawzawl College a ni.
Kolasib-ah chuan Minister of state K Lalrinliana hovin DC Circiut House-ah Green Mizoram Day an hmang a. Lawmman hrang hrang an sem a. Kangmei veng tha ber Vengthar, Kolasib niin, 2-na Bairabi North; 3-na Tumpui, Kolasib an ni a, Thing phun kawnga hma la tha Pahlira, Lungmuat hnenah chawimawina thuziak an hlan bawk.
Mamit-ah chuan Mamit Mualpui pengah Green Mizoram Day an hmang a. Lawmman hrang hrang semin, kang mei veng tha ber Kawrtethawveng khua an ni a, 2-na Kawrthah North, 3-na New Mamit te an ni.