Larsap Dr. Hari Babu Kambhampati-a’n nimin khan Kolasib-a Indian Council of Agricultural Research (ICAR) Centre tlawhin, ICAR mithiam ten thlai leh ran zirbingna lehkhabu pathum an buatsaih a tlangzarh a. Tribal Sub-Plan hnuaia loneitute puihna tur hmanrua a hlan nghal.
Larsap chuan ICAR hmalakna hnuaia Tribal Sub Plan kaltlanga Kolasib district-a khaw panga atanga loneitu 100 thlan chhuahte hmaah thu sawiin, ei leh bara intodelh tura hmalak a pawimawh zia sawiin, hemi kawngah hian ICAR mithiamte tangkai taka chhawr thin turin a chah a. Sorkar laipui ruahmanna hnuaia mirethei zawkte khawsak dinhmun chawikanna tur scheme hrang hrangte chu a nih tur ang taka a dawng tur awm tak ten an hmuh a pawimawh thu sawiin, chumi tur chuan mahni chanvo hriatchian chu mitin mawhphurhna a nih thu a sawi.
ICAR enkawlna hnuai a loneitute thil tharchhuahte chu man man zawka tihral a nih theih nan a hlutna tizual turin a sawngbawl kawngah leh a tuam mawi dan thlenga hmasawn zel turin a chah bawk.