Science Teachers’ Association of Mizoram (STAM)-in kumina HSLC leh HSSLC exam-a Mathematics leh Science subject topper te hnenah nimin khan STAM Proficiency Award a hlan.
STAM Proficiency Award sem inkhawm hmanpuitu HRD Board Vice Chairman L. Thangmawia’n “Zofate zingah Scientist leh Mathematician ropui tak tak kan tam a hun tawh hle, hnamdangin min kal pel thui tawh” tiin, “Civil service-a lut tura kan beih nasat ang tluk bawkin Scientist ropui tam tak nei tura nasa zawka tan kan lak a ngai a ni” a ti.
L Thangmawia chuan STAM Proficiency Award dawngtute chu a lawmpui thu sawiin, topper an nihna chu vawngnung zela, Scientist ropui, India leh khawvel huap pawha mithiam bik an nih theih thu leh chutiang chu Zoram mamawh berte zinga mi a nih tawh thu a hrilh a. Ram leh hnam tana thiamna lama tan la sauh sauh tura fuihin, Mizoramin MBSE Science leh Mathematics topper te atanga beiseina sang tak a neih thu leh hun lo kal zel turah an hnen atanga hlawhtlinna ropui tak beiseia a lo thlir reng tur thu a sawi.
“Lehkha thiam thei te nih tura a nawlpui anga kan duh ber nia lang chu Civil service lam te a ni, mahse, ram hmasawnna tak tak thlen theihnana tangkai berte chu Scientist te an ni” L Thangmawia chuan a ti a. “Kan mamawh khawp buh leh bal kan thar chhuah theih nan te, khawl leh thil dang Zopa mil kan siamchhuah theih nan te, kan ram thing leh mau tangkai zawka sawngbawl a nih theih nan te, ramhhmul damdawi sawngbawl nan te, kawngpui tha zawk kan neiha theihna tur leh kan mamawh tam takte Science thiamna hmanga kalpui a tul tak zet a ni” a ti bawk.
He Award semna hun hi Pu R.Lalengmawia, President, STAM in a kaihruai a, Pu Lalmuanpuia, Jt Seretary, STAM chu Master of Ceromony niin topper 16 te hnenah Award hi hlan a ni a. Award hi mi inphalte thawhkhawm niin citation bakah sumfai a keng tel a. He hunah hian Award dawngtute leh sumpai thawhtu(Donor) ten thu an sawi a, Pu Zothanliana, General Secretary, STAM chuan lawmthu sawiin hun a khar a ni.