Mizorama buhfai rimchhia/uih thleng chungchangah Food Corporation of India (FCI) Divisional Manager Zodinpuii Ralte-in Mizoramah buhfai rimchhia/uih a theng chu railway lam fimkhur loh vang niin a sawi a. “Buhfai zawng zawng enfiah vek a ni anga, a chhe zat man hu chawi tir an ni ang” a ti.
Buhfai rimchhia/uih chungchangah hian nimin khan thuthar thehdarhtu thenkhatin Rengtekawn, Kolasib-a FCI kudam an tlawh a. FCI Divisional Manager chuan buhfai rimchhia/uih lo thleng chu railway lam fimkhur loh nih thu leh chawi tir an nih tur thu leh railway-in an bungraw phurh te him taka thlen tur an nih laiin buhfai an phurhna wagon te ruah lakah a him tawk lo niin a sawi.
Tunhnaia Bairabi kaltlanga buhfai lakluh te chu a rimchhiat avangin thenfai mek a nih thu FCI lam chuan an sawi a. Technical assistant Alfrida chuan Rengtekawn-a FCI kudama buhfai thleng tura beisei truck trip 23 atangin trip 17 an dawng tawh nia sawiin, Mizoram FCI kudam hrang hrangah buhfai chhia chu a thlen thu leh hralhchhuah hmaa thenfai hna thawh a nih thu a sawi bawk.
FCI Divisional Manager Zodinpuii Ralte-in a sawi danin, tunhnaia ruahsur nasa avanga Halflong bul, Assam-a tuilianin rel kawng a tihchhiatin Mizorama buhfai lakluh kawngah harsatna a siam a. Rel hmanga buhfai lakluh theih a nih loh avangin Mizoram mamawh lalut turin truck engemawzat tirh an ni.
Kawng chhiat hnuah truck 29-in Guwahati aṭanga buhfai phurin Mizoram pan tawh mahse, nimin thleng khan truck 16 vel chauhin Mizoram an la lut thei niin FCI Divisional Manager chuan a sawi a. Truck ringawt hmanga buhfai lakluh chuan mipui mamawh a phuhruk zawh dawn loh avangin Assam chan tur buhfai, relin a phurh chu Mizoram tana pawhpen a ni a, rel kawng chhia vanga kawng laka thlakhat chuang thang tawh te an nih avang leh rel pindan ṭha tawk lo avangtea wagon-a tui lutin, buhfai chu a ti rimchhia/uih ta nia hriat a nih thu a sawi.
Nimina thuthar thehdarhtu ten an tlawh lai hian Rengtekawna FCI kudam-ah buhfai matric ton 655 a awm mek a, tuna buhfai rawn thleng thar, an thenfai mek chu bag 1963 ni tawhin an la dawn loh truck trip 6 vel kudam pawn lamah a la awm bawk.
Buhfai phurtu truck driver ten an sawi danin, an buhfai phurh chu Bairabi-a an load tirhin motor aṭanga tui far thei khawpin a huh nasa a, Rengtekawn an thlenin, ni hnih te din tir an nih hnuah an unload a, buhfai a lo ro ṭan tawh a, a kim lo (short) nasa thei hle niin an sawi a. A kimlohna chu Kg khatah Rs. 30 zel chawitir an nih thu sawiin, “A lungawithlakloh khawp mai” an ti. An buhfai phurh chu hralhruk ngam pawh ni lo khawpa rimchhia nia sawiin, “FCI in railway lamah buhfai chhia chu chawitir an tum tho a, chutah chuan a kim loh na kan chawi ai chu telh ni mai se kan duh khawp mai” an ti bawk a ni.
FCI thawktute chuan buhfai phurtu truck te chu anmahni truck association lamin serial an pe a, an lo thlen hlimah a hmasa apiang an lo dawn theih ngawt loh thu leh serial siam chu an mawhphurhna a nih loh thu a sawi a. Buhfai rimchhia chu kum dangah pawh a thlen chang a awm thu sawiin, thil danglam bik a nih loh thu leh tuntuma lo thlengte thenfai nan karkhat vel hun a duha an rin thu an sawi bawk.