Aizawl South I bialtu MLA C. Lalsawivunga’n Mizoramin vision nei tha, hmathlir nei tha Chief Minister a mamawh niin a sawi.
Nimina ZPM party chhung inkhawmah he thu hi C Lalsawivunga chuan a sawi a. “Zoram mipui hian roreltu tha, Pathian tihna tak tak nena ram kaihruai ngam Chief Minister kan mamawh a, chumi ang hruaitu nei tur chuan ram mipuite ngaihtuahna tak tak seng turin ka sawm” a ti.
C Lalsawivunga chuan “Airport a chim a, a mawhphurtu hrem a ni lo, tribal ni hauh lo tribal certificate kan pe a, dan anga tribal a nihna hlih a nih hnuah first class contractor nihna kan pe zui a, he ramah hian dan hian awmzia a nei ta lo em ni tih hial tur a ni” a ti a. “Pathianin ram tha tak min pe a, boruak thianghlim, sik leh sa nuam, ruahtui tha tak kan mamawh engkim min pe a; tuna kan ramin a mamawh em em chu kawlphetha leh kawngpui tha a ni a, kum 35 state kan nih tawh hnua kan ram dinhmun hi ngaihtuahin a lungawithlak mawlh lo” a ti.
“Missionary hmanga Pathianin a zawnchhuah ram hian hruaitu dik leh tha neih hi kan phu” tiin, C Lalsawivunga chuan “Chumi nei tur chuan a lama rilru dik pu chungin ram hruaitu tha i thlang ang u” a ti a. Roreltu tha lo rorelna hmunah mirethei leh hausa kar a zau tual tual nia sawiin, “Diklohnain Mizoramah tual a leng mek a, rorelna dik tundina a awm ngeih theihna turin ram mipuite thawhpuiah ka sawm che u a ni,” a ti bawk.