MZP Hqrs., Kolasib-in nimin khan Parish Hall, Venglai, Kolasib-ah kumina HSLC leh HSSLC exam-a tithate chawimawina hun an buatsaih a. HSLC distinction-a pass mi 14 leh HSSLC first division leh a chunglama pass mi 120 te hnenah lawmpuina thuziak, pawisa leh Lalhruaitluanga Chawngte lehkhabu ziak ‘Zirna Kailawn’ te an pe.
Kolasib-a zirlai titha chawimawina hun hi bialtu MLA, minister of state K Lalrinliana’n telpuiin, zirlaite chu sorkar hna chauha innghat lo tur leh ram hmasawnna tur leh mahni intundinna khawp thiamthil neih a pawimawh thu a hrilh a. Sorkarin puitlinga a ngaih chin zirlai kum 18 chin tawh te phei chu hmalam hun tur uluk taka chhut chunga zirna kawng zawh chhunzawmnaah duhthlanna fim tak hmang turin a chah.
MZP General Hqrs-a Asst Gen Secretary Chinkhanmanga Thomte pawhin he hun hi hmanpuiin zirlaite chu zirna tibuai thei zuk leh hmuam bakah ruihtheih thil dang laka fihlim turin a chah bawk a ni.