Champhaia Grape chingtute’n July thla tir atangin Grape rah seng tan an tum a, hetihlai hian Winery-a grape tui sawr sa dah litre nuai 1 chuang an neih avangin loneitute an mangang ru hle. May ni 27,2022-a Excise Force te’n Millenium Centre-a Grape wine an man sak chu a neitute hnenah pek let a la ni lo.
THE ZOZAM TIMES zawhna chhangin Champhaia Grape Growers Society (CGGS) hruaitute chuan, July thla tir atangin Grape rah seng tan an tum thu an sawi a, hetihlai hian Winery-a tanky te a khah deuh vek avangin grape lawh thar tui sawrte dahna tur an nei rih lo tih an sawi.
Grape rah chu a hunah an lawh loh chuan a til vek dawn a, July thla chhunga an lawh zawh loh chuan seng tlak lohah a chhuak thei tih an sawi a,”Grape lawh hi hun mahse a tui sawrna turin zem tam tak ruak kan mamawh a, tuna kan neih sa lah kan ti ral thei si lo a, kan rilru a mangang ru hlawm tawh hle,” an ti.
Champhai Winery-a grape tui sawr an dah khawl mekte chu grape thar an seng leh hma ngeia tih ral a nih theih nana hmalak sak turin Champhai MLA te an lo ngen tawh thu an sawi a, tun dinhmuna an mamawh leh hmalak ran ngai thil a nih thu an sawi.
Tun dinhmuna Champhai Winery-a Grape tui an neih dan sawiin,”Kum 2020-a grape thar kan sawr tawh litre sing 3 vel a awm a, kum 2021-a kan sawr litre sing 7 vel a awm bawk a, hralh chhuah theih ‘Champwine’ case 13000 vel kan kawl mek bawk,” an ti.
CGGS, Political party leh pawl thenkhat te’n May ni 27,2022-a Excise Force te’n Millenium Centre-a Grape wine an man sak chu a zuartute hnenah pe let turin sorkar phut mah se tun thlengin an la pek let loh thu CGGS hruaitute chuan THE ZOZAM TIMES zawhna chhangin an sawi.
Hemi chungchangah hian Excise minister chuan, Wine an man te a zuartute hnena pe let turin tan chhan tur dan mumal a awm rih loh thu an inkawmnaah a lo hrilh niin CGGS hruaitute chuan an sawi a,”Minister hian lo nghak hret rawh u min ti a, kan phut anga wine rules te siam a nih hunah an pe let dawn pawh a ni maithei,” an ti.
An thar chhuah Grape tui sawr atanga wine an siamte zalen taka an hralh theihna tura Wine Rules siam tura sorkar an phutna chu tihhlawhtlin a nih an beisei tih an sawi a,”Sorkar hotu lamte nen kan in dawr kual dan thlirin beiseina sang tak kan nei a, wine rules hi an siam ngei kan ring,” an ti bawk.