‘A thlawna thisen pek hi inpumkhatna thlentu a ni. Lo pe ve la, nunna chhan him rawh’ tih thupuia hmangin nimin khan Govt Leitlangpuii HSS, Lungleiah World Blood Donor Day an hmang a, thisen pek huaihawt nghal a ni a. Christian Hospital, Serkawn Blood Bank-in Baptist HSS, Serkawn-ah thisen pek runpui an huaihawt bawk.
Association for Voluntary Blood Donation (AVBD), Lunglei branch, MSACS leh NSS Unit, Govt Leitlangpuii HSS te tanghovin an buatsaih Govt Leitlangpuii HSS-a World Blood Donor Day hmanna ah hian Lunglei district-a a thlawna thisen pe tha, pawl leh mimal te chawimawi an ni.
AVBD Lunglei branch president, Lunglei civil hospital-a medical superintendent Dr SR Ngurchamliana’n Lunglei district-a blood bank pahnih – Civil Hospital leh Christian Hospital-ah nikum chhung khan thisen unit 3557 pek a nih thu sawiin, heng zinga za-a 98.48 chu a mamawh apiangte hman tura pek a nih thu a sawi a. Thisen petute lawmthu hrilhin, thisen pek uar deuh deuh tur leh midangte pawh thisen pek hlutna zirtirtu ni theuh turin kalkhawmte a chah.
Lunglei district-a a thlawna thisen pe tam ber unit 53 pe tawhtu Lalhmingchhuanga Chhangte, Bazar Veng Lunglei leh Lunglei district hmeichhia thisen pe tam ber unit 30 pe tawhtu NG Lalbiakdiki, Bazar Veng Lunglei te bakah June ni 14, 2020 atanga June ni 13, 2022 inkara unit 6 pe chin – Joseph Lalhrilmawia, Farm Veng, Lunglei leh J. Lalrinenga, Ramthar Veng, Lunglei te an chawimawi a. June ni 14, 2020 atanga June ni 13, 2022 inkara kohhran/pawl/zirna in hrang hrang thisen pe tha te an chawimawi bawk.
June ni 14, 2020 atanga June ni 13, 2022 inkara Lunglei district-a thisen pe tha te :
I – Kohhran
1st – Bazar Pastor Bial TKP – Unit 304
2nd – Chhipphir Pastor bial TKP – Unit 145
3rd – Adventist Youth Federation, Lunglei – Unit 137
II – Zirna in
1st – Lunglei Government College, NSS unit – Unit 139
2nd – BHSS Serkawn, NSS Unit – Unit 67
3rd – Govt Higher Secondary School Lunglei – Unit 53
III – NGO
1st – Haulawng Branch YMA – Unit 75
2nd – Serkawn Branch YMA – Unit 64
3rd – Sub Hqrs YMA Hnahthial – Unit 44
IV – OTHERS
1st – John Williams Hospital – Unit 87
2nd – LDSC Lunglei – Unit 68
3rd – HQ COY 3(NH) BR Assam Rifles & B +ve Group Lunglei – Unit 8 ve ve.
Lawngtlaiah pawh World Blood Donor Day hi AVBD, Lawngtlai leh District Hospital Blood Bank ten LADC conference hall-ah an hmang a, thisen pek runpui an buatsaih bawk.
AVBD, Lawngtlai President Elvis Lalthangzuala’n thisen pek pawimawhna leh midangte pek tlak thisen thianghlim nei tura mahni invawn thianghlim leh hriselna ngaihpawimawh a ṭul thu a sawi.
Hun bi neia an hnuaia bial leh unit-te thisen pek hun ruahman ṭhin kohhran ṭhalai pawl pahnih – Lawngtlai Area Ṭhalai Kristian Pawl coordination committee leh Lairam Isua Krista Baptist Kohhran Central Ṭhalai Pawl te hnenah chawimawina thuziak hlan a ni a. Nikum June ni 14 leh kumin June ni 14 inkara pawl leh kohhran hminga thisen petute – YLA, M. Kawnpui branch; Salvation Army Youth, CO Bial; KṬP, Lawngtlai Pastor Bial; PYD (Mizoram), Lawngtlai Bial; PYD (UPC NEI), Lawngtlai District; Adventist Youth Federation, Lawngtlai Branch; NSS Unit, Govt Lawngtlai College leh NSS Unit, GRHSS te chawimawi an ni bawk.
Nikum chhung khan Lawngtlai blood bank-ah thisen unit 1103 pek niin, heng zinga unit 936 (84.8%) chu a mamawh apiangin an hman atana pek a ni a. Nikum chhung veka Blood bank aṭang thisen pekchhuah – District Hospital Lawngtlai-ah unit 407 (45.8%), Lairam Christian Medical Centre & Hospital-ah unit 431 (48.7%) leh Christian Hospital Lawngtlaiah unit 49 (5.5%) a ni.