Nimin June ni 14 khan thisen petute ni, world blood donor day a ni a, He ni pual hian Mizoramah pawh Aizawl leh District khawpui hrang hrangah hun hman a ni. Thisen pe tha pawlte hnenah chawimawina hlan a ni a, Central Kristian Thalai Pawl (CKTP) chu thisen pe tha ber chawimawina Voluntary Blood Donation Award 2022 hlan a ni.
World blood donor day hi Aizawlah chuan Mizoram State Aids Control Society (MSACS),Association for voluntary blood donation (AVBD) leh state blood cell, NHM huaihawtin Aijal club-ah hman a ni a, Health minister Dr R Lalthangliana’n a hmanpui.
Dr Thangtea chuan mihring dam chhung tawite ah midangte tana inpekna tluka hlu leh ropui a awm lo tih sawiin,”Pathianin Mizote thinlungah mahni mihringpuite hmangaihna, mi dangte lainatna leh duhsakna a dah a, chumi lanchhuahna pawimawh ber te zinga mi chu mamawhtute tana a thlawna thisen pek voluntary blood donation hi a ni,” a ti.
Mahni tana hlawkna um lova damlo mangangte tana an din tlat avangin a thlawna thisen petute chu fakawm an tih thu a sawi a, ABVD te hmalakna ropui a tih thu leh a thlawna thisen pekin 100% a kai theih nan tan la chhunzawm zel turin a fuih a ni.
He hunah Voluntary Blood Donation Award 2022 sem ani a, religious category ah Central KTP pakhatna niin, TKP Co-ordination Committee, Aizawl chu pahnihna an ni a, PYD, North East India te chu pathumna an ni. YMA Category ah Chanmari West Branch pakhatna, pahnihna chu Bethlehem Vengthlang niin, Aibawk Branch chu pathumna an ni.
College zingah Pachhunga University College NSS ten lawmman pakhatna dawngin, Hrangbana College NSS chu pahnihna an ni a, Aizawl College NSS te chu pathumna an ni. Higher Secondary School-ah Synod HSS NSS te pakhatna niin, Helen Lowry HSS NSS te pahnihna niin Govt Central HSS NSS te pathumna an ni.
Miscellaneos Category-a pakhatna chu Mizo National Youth Front te chu pakhatna an ni a, Mizo Chelsea Suppporters Club te chu pahnihna niin, 225 CRPF Zemabawk te chu pathumna an ni.
A pumpuia ti tha Over-all Special- Award ah Central KTP in lawmman pakhatna la in, Mizoram NSS-in pahnihna leh Central YMA ten pathumna an la a ni.
Kum 2021-2022 financial year chhunga Mizorama thisen pek zawng zawng chu unit 28191 a ni a, chung zinga unit 25396 chu voluntary donation a ni.