YMA, Chaltlang branch, Aizawlin nimin khan YMA Day an lawm ruain an branch kum 75-na (platinum jubilee) an lawm a. Bialtu MLA Vanlalhlana’n a telpui.
Chaltlanga YMA Day leh platinum jubilee lawmna hi YMA, Chaltlang branch vice president Chawngsiamliana’n kaihhruaiin, president Lalhruaitluanga’n inlawmna thu a sawi a. Hruaitu hlui te, tlawmngai pawl dang te, khawtlang mihmingthate, YMA member te leh khawtlang mipui tel an thahnem hle. Hnam lam chi hrang hrang leh zaithiam zai te nen hlim takin hun an hmang a ni.
He hun hmanpuitu bialtu MLA Vanlalhlana’n kalkhawmte YMA Day leh branch platinum jubilee chibai bukin, duhsakna a hlan a. “Chaltlang branch YMA hian ngaihtuahna thar hmangin thlanmual chungchangah hma an hruai tawh a, tunah mitthi ruang dah lailawkna hmun an ngaihtuah chhuak leh te hi a remhriatthlak hle” tiin, hei hi bialtu MLA pawh an hriattir thu leh platinum jubillee thilpek atana pek a tum thu a sawi a. “Vengchhung leh Aizawl khawpui tan pawh a tula hman atan branch YMA-in a enkawl tura hmalak zel ni se ka duh a ni,” a ti bawk.
Bialtu MLA Vanlalhlana chuan Mizoramah ruihhlo a lut nasa nia a lan thu sawiin, thalaite ruihhlo laka fihlim turin a chah a. “Mipat, hmeichhiatna leh ruihhlo laka fihlim turin nun i uluk ang u,” a ti.
Mizorama ramngaw te pawh a chereu nasat thu sawiin, Vanlalhlana chuan “Tuihna a kangchat a, nungchate an rem a; tunge humhalh tura lo penchhuak ang? He Chaltlang kham chawi velah hian Rinhnim thing i phun ang u. Thing tiak hi boral mai mai lo tur ni se, kuminah kung 20 tal phun hram ka duh, chutianga kan tih theih chuan kung khatah MLA fund atangin Rs. 5,000 tum thei turin kan inring ang, hei hi platinum jubilee puala thangtharte tana kan hnutchhiah tur a ni,” a ti bawk.