Aizawl khawpui laili atanga Assam Rifles te an insawn dan tur chungchang chu nimin khan Mizoram sorkar hotu lu te Assam Rifles hotute’n an sawiho a, Assam Rifles te an la insawn theih loh chhan chu anmahniah lo sawiho a, rang taka hma la turin an inhrilh a ni.
Chief Minister Zoramthanga hova thutkhawmah hian Deputy Chief Minister Tawnluia, Home Minister Lalchamliana leh Land & Revenue Settlement Minister Lalruatkima leh Assam Rifles hotute an tel an ni.
Kum 2019-a Ministry of Home Affairs in Assam Rifles insawn thuai tura lehkha a lo thawn tawh hnua thenkhat chauh an la insawn leh, Assam Rifles lamin hun tiam an bawhpelh nasat dante he thutkhawmah hian an sawiho a ni.
Thutkhawmah hian Mizoram sorkar chuan a tih tur ang te a tih tawh thu leh, ruhrel pawimawh din chungchanga bawhzui ngai thenkhat an thlen te pawh chak taka bawhzui a nih zel tur thute sawi lan a ni a, Assam Rifles te an la insawn theih loh chhan chu anmahniah lo sawiho a, rang taka hma la turin an inhrilh a ni.
Assam Rifles te Aizawl atanga an in sawn chhuah chungchanga Deputy CM leh Home Ministry lam hotute tunhnaia an inkawmna chungchangte pawh thutkhawmah hian ngaihthlak niin, hemi chungchangah hian sorkar laipui atangin Mizorama lokal tur an awm thu sawi chhuah a ni bawk.