Kum zabi sawmhnihna chhunga theologian ropui ber pawl, German Pathian thu thiam Karl Barth chuan, “Kan kut lehlamin Bible kan keng ang a, a lehlamin chanchinbu kan keng tur a ni” tiin Media pawimawhzia hi a lo sawi tawh a. Vawiin thleng pawhin kohhran leh ram inrelbawlna atan Media pawimawhzia hi kan hre chho zel a ni. Media hi sawifiah leh chuan ngai tawh lo khawpin vawiinah chuan mi tinin kan hman mek leh kan banphak a ni tawh ti ila kan sawisual awm lo e. Chanchinbu, Tv leh Internet kaltlanga chanchin thar leh thu leh hla kan vawrhdarh zawng zawngte hi Media chu an ni tiin kan kaikhawm mai thei awm e.
Lal Isua leh Media :
Nazareth khaw tlangval naran, Mari leh Josefa fapa, thingrem siamtu Lal Isua khan Juda te sakhaw dan leh hrai tam tak, nghet taka an lo vawn tawh leh Mosia hnena Pathianin a pek te kha thunei takin mipuite a zirtir a, a lo larin zuitu tam tak kha a nei chho ta a. Chu chuan an sakhaw hruaitute leh sorkar rorelna thlengin nghawng a nei a. Chuvangin Jerusalem atangin Media lam, lehkhaziaktute khan Lal Isua chanchin kha chhui chiang turin an lo kal a ni tiin ESV Global Study Bible chuan a sawi a (Mk. 7:5). Chung Media mi te leh sakhaw hruaitute zawhna hrang hrang avang chuan Lal Isua zirtirna leh a thiltum te chu chiang takin kan lo hriat belh a; kan Bible pawh a hauhsak belh a ni kan ti thei awm e.
Media rintlak kan mamawh:
Ram leh hnam, kohhran leh kan thlarau nun thlenga thil dik leh tha, kan zawm tur leh kan hriattur, thudik leh dik lo kan hriatna hnar pawimawh ber chu Media a ni tawh a. Media rintlak leh tha chuan ram leh hnam, sakhuana thlengin a khalh ngil a; kan hnawl tur leh siam that ngaite kan hriat phah thin. Harriet Beecher Stowe – i lehkhabu ‘Pu Tom-a In’ chuan mi hâng ho tawrhna leh sal nun diktak a tar lang a. Chu chuan Barack Obama chu US President hial nih tir thei khawpin rah tha chhuah tih kan hria. Martin Luthera ‘thesis’ 95 ziah chuan Roman Catholic kalphung dik lohna a tar lang a; Siam that Kohhran kan lo din phah ta reng a nih hi. He entirna pahnih lek atang pawh hian Media hmang hian kan ram leh hnam hi thlak danglam theih a nih zia a takin kan hmu.
Mizote leh Media :
Mizo te pawh Media hmang nasa kan ni a, tangkai taka hmangtu pawh kan pung zel a, a lawmawm hle. Journalist rintlak Zmp Tlau kan nei mek a. Ani hnen atang hian Sorkar leh contractor hna thawh dan fel tawk lo te, Mizoram Chief Secretary atana hnam dang hnawk kan tihna chhan ni awma lang te a sawi a. Tumahin an khin let loh avangin a thusawi hi a dik ni pawhin a lang. Hetianga mi huaisen leh tha, thil dik lo tarlang ngam Media mi hi nei zel ila, kan ram hi kalphung dikah kan hruai lut ngei ngei ang. Thudik puang ngam lo leh sawi ngam lo; thu awih awm loh leh a taka chang thei lo thu sawi fo te hi mipui, thalai tam tak hi chuan kan duh tawh lo tih hi a lang chiang hle. David Sailo thu leh hla tam tak te hi mi tam tak sawi ngam loh, thudik tak ni si a ni a. Fake Account a ni tih hre rengin ‘blue tick’ nei te thu leh hla aiin kan bawhzuiin kan ngaihsak lo thei lo a nih hi!
Thalaite leh Media :
Thlai tam zawkin Media kan hmang a; a chhe zawnga hmang tawk lo awm mah se a tha zawnga hmang te hi a tam zawk kan ni. Chuvangin mi puitling leh a ngaihna hria te chuan Media rin tlak, kan ram leh hnam, kohhran siam thatna atan hian Media hi kan hmang nasain kan hmang tangkai chho mek zel tih pawh kan hmu. Chuvangin Media rintlak leh tha, huaisen taka thil dik tarlang thei hi kan neih zel chuan kan ram hi kan siam tha zel dawn niin a lang. Tute emaw thluâk sûk thu leh hla, a dik a dawk thlu loa thil dik lo leh awih awm loh lutuk thu leh hla hi chu kan nuih zat hle tawh a nih hi. Chuvangin Media mite hian thudik leh thudik lo hi chiang takin thlalai te min hlui zel se la. Kan ram hi kan siam tha chho zel ang.
Ram leh hnam hmangaih tak tak, thil tha duh, rual awt taka awm thalai, nu leh pa hi Mizoramah mi tam tak kan awm a. Chung mite chuan Media hmangin thu dik leh rintlak, kan hnawl tur leh kan siam that tur hriat hi kan mamawh a. Chuvangin Media mite hian tan lo la se la; Pathian rinchhanin kan ram leh hnam hi i siam tha ang u tiin kan insawm a ni.