ZPM thalaiin “Mizoram sorkarin Mizoram state health care scheme (MSHCS) sum indaihlohna phuhrukna tura Asian Development Bank atanga loan Rs. nuai 1,000 puk a tum hi Chief Minister Zoramthanga opposition-a a awm laia NLUP chungchanga Congress sorkar a kahna, ‘Bang chhaklam sahthlaka, bang thlang lama bel ang’, a tih nen khan thuhmun rengah kan ngai” an ti.
Sum enkawl kawngah MNF sorkar chu Congress sorkar ang thovin an hlawhchham niin ZPM thalai chuan an sawi a. Chief Minister-in Assembly session-a damlo apiangin an hman tur cheng nuai 2 thlenga dah sa a nih thu a sawi tawh hnuah pawh, health care sum ba Rs. vaibelchhe 70 chuâng a awm leh cheng tam tak pûk ngaia an awm chu mak an tih thu an sawi.
ZPM thalai chuan “Damlo apiangin an hman tur atana ruahman sa cheng nuai 2 ṭheuh kha kan Chief Minister zahawm tak hian bang chhak lam sahthlâka, bang thlang lam belna atân a hmang ta mai em ni, tih hi kan zawhna a ni” an ti bawk.