Aizawl Mayor Lalrinenga Sailo chuan nimin khan Aizawl khawpui chhunga Local Council Chairman leh Secretary zawng zawngte AMC Auditorium, Thuampuiah ko khawmin, khawpui hmasawnna kawnga hmalak dan tur a sawipui.
Aizawl Mayor chuan, Local Council chu AMC hnuaia awm a nih angin department dangin an chhawr dawn a nih chuan AMC phalna an neih hmasak a ngai tih a sawi.
Leilaih khuahkhirh dan chungchang sawi chhunzawmin,”Aizawlah hian lei laih kaihhnawihah nunna tamtak kan lo chan tawh a, in leh lo tam tak a lo chhe tawh bawk,” a ti a, hemi avang hian sawiselna leh dodalna nasa tak karah AMC in leilaih khuahkhirh dan chu Aizawl mipuite himna atan a keng kawh ta tih a sawi.
He thutkhawmah hian AMC Official te atangin AMC hmalakna leh ruahmannate ngaihthlak a ni a, kalkhawmte chuan Aizawl khawpui hmasawn zelna tura AMC hmalak mek leh hmalak tur hrang hrangte sawihoin – leivung paih chungchangte, ran khuahkhirh chungchangte, Single Use Plastic (SUP) khap chungchangte, bawlhhlawh senghawi leh sawngbawl chungchangte, vehicle parking chungchangahte, chak zawk leh awmze nei zawka hmalak chhunzawm dan tur an sawiho a ni.