ZPM thalai president, AMC councillor ni bawk Malsawmzuala Ralte in khua/veng thenkhata MNF party unit ten Mizoram sorkar flagship programme SEDP dilna form/format pe chhuakin, a dawngtu tur an thlang nia sawiin, hei hian mipui a barakhaih hle niin a sawi.
Malsawmzuala chuan sorkar pawisa kum 2022-2023 ah Mizoram sorkar flagship programme SEDP-ah Rs. vaibelchhe 700 dah a nih thu leh he sum hi MNF party sum a ni loh thu sawiin, “Budget ami, mipui sum ngei a nih avangin intithu taka party fund ang maia ruling party unit ten an lo hman hi a rem lo” a ti.
Mipui sum, mipuiin an chanpual an dawn turah ruling party unit-in dilna form pechhuaka, a dawngtu tur an thlang chu democracy rahbehna lian tak a nih thu ZPM thalai president chuan a sawi a. “MNF unit ten SEDP dawng tur an lo thlanga, a dilna form te an lo pe chhuak a nih chuan, SEDP hi mipui sum (budget) aṭanga sem lovin, an party sum aṭanga sem turin kan phut” a ti.
ZPM thalai president chuan sorkar hmalaknate chu mipui tan a nih thu leh budget chu mipuite ta a nih thu sawiin, tih bîk neih a thiang lo tih a sawi a. “Chief Minister berin SEDP dawngtu tur thlangtu tur chu MNF unit an nih thu a sawi te kha MNF hi huapzo sorkar an nih loh zia tichiangtu ani a, state khata sorkar hotuber-in a sawi awm loh tak a sawi a ni” a ti.
Malsawmzuala chuan “Congress sorkar atang tawhin sorkar sum hi party sum ang maia hmana, thlauh thlâk bik neih fo hi hmasawnna kawnga min tihnufumtu a ni a, sim a hun tawh” a ti bawk.