MNF party adviser, MLA ni bawk Dr. F. Lalnunmawia’n Mizoram State Health Care Scheme (MSHCS)-a harsatna sutkianna turin Asian Development Bank (ADB) atanga loan puk tura tihfel a nih thu sawiin, a rulhna lamah za-a 90 chu sorkar laipui rulh tur a nih thu leh state-in a rulh tur za-a 10 a nih thu a sawi.
Nimina MNF party chhung inkhawmah he thu hi Dr. F. Lalnunmawia chuan a sawi a. ADB loan puk tur chu eptu party thalai ten hrethiam lovin an sawisel tih sawiin, bang chhak sahthlaka bang thlang lama bel tum ang nia an sawi nen chuan intu lo tak niin a sawi.
MSHCS atana ADB loan puk tur chungchang chu sawifiahin, Dr. F. Lalnunmawia chuan “ADB loan Rs vbc 1004 tih hian ADB atangin 80% (Rs vbc 803.76) loan anga puk tur a ni a, a bak 20% (Rs vbc 200.94) chu state tum tur a ni. Loan Rs vbc 803.76 ah hian Central-in 90% (Rs vbc 723) atangin a rul ang a, Mizoram sorkar-in 10% (Rs vbc 80) atangin a pung a rul thung dawn a ni” a ti.
Dr. F. Lalnunmawia chuan chuan “Pu Zoramthanga’n NLUP chungchanga “Bang chhak sahthlaka bang thlang lama bel ang” a tih chu ‘NLUP hi state budget ni lo, PM special package aṭangin kan sem ang an ti ṭhin a’ a sem huna state budget aṭang veka an sem leh si a sawina a ni” a ti a. Tuna ADB loan puk tur chungchang nena eptu thalai ten an sawizawm chu thil intu lo tak niin a sawi.
Hri leng, ramri buai, lirnghing, raltlan leh harsatna dang dang karah sorkar hmalaknaa lawmna tur tam tak a awm thu sawiin, Dr. F. Lalnunmawia chuan “Tu pawh sorkar se hetiang bak hian a kal theih a rinawm chuang lo” a ti a. MNF sorkar lai ni lo se tun aia dinhmun chhe zawk fe-ah Mizoram chu a awm a rin thu a sawi.
Dr. F. Lalnunmawia chuan sorkarin Zoram mipui tam ber duh danin hma a la thin nia sawiin, “Covid19 do-naah kohhran, NGO leh mipui duh dan thlir chung zelin sorkarin hma a la a, thawhhona tha tak avangin India ram state zingah hrileng do kawnga thawk tha ber leh Covid19 vanga nunna chan tlem ber state zingah kan tel a ni” a ti a. Zu leh ruihhlo do kawngah leh ruihhlo bawiha tangte chhawmdawl kawngah pawh tlawmngai pawl leh kohhran mipuite duhdan thlir chungin sorkarin hma a la a nia sawiin, “A theih chin chinah mipui aw ngaithla chung zelin kan sorkar hi a kal a ni” a ti.
MNF party adviser, MLA ni bawk Dr. F. Lalnunmawia chuan sorkar flagship programme SEDP kaltlanga hmalakna hrang hrang te, sports lama hmasawnna leh ram hmasawnna tura sorkar hmalakna dang hrang hrang te a sawi bawk.