Mizoram state rural livelihood mission (MzSRLM) bultuma hmalakna – Lawntlang Juice Extraction Centre (thei sawrna khawl)- Suangpuilawn ami chu Assembly Speaker Lalrinliana Sailo leh Rural Development Minister Lalruatkima ten nimin khan an hawng.
Assembly Speaker, bialtu MLA ni bawk Lalrinliana Sailo chuan theitui sawr chhuahte a tlangzarh a. A bial chhungah khawl tangkai bun fel a ni chu lawmawm a tih thu sawiin, Suangpuilawn chu khaw taima an nih avangin an hlawhtlinpui ngei dawn tih a hriatchian thu leh Centre than zelna leh hmasawn zelna tura theihtawp chhuah a tum thu a sawi bawk.
RD Minister Lalruatkima pawhin Suangpuilawn khuain hmasawnna rahbi thar a chuangkai chu a lawmpui thu a sawi a. Ramdang nen insumdawntawnna tur hmun hrang hrangah Border Trade Centre tihhlawhtlin thuai a ni dawn tih sawiin, “Hengte hi chhawr tangkai ngei tura tanlak a pawimawh” ti a. Thei rah sawr tur hnianghnar taka nei reng tura kuthnathawktu, thei chingtu ten tan an lak sauh sauh a pawimawh thu a sawi. Lawntlang Juice Extraction Centre-a hman tur generator tha neih dan a ngaihtuahpui tur thu a sawi bawk a ni.