Venghlui chuanhnuai ‘Lamhnai area’ chawmtu tur Aizawl Zero point tuikhur chu Inrinni khan Aizawl Mayor Lalrinenga Sailo-in a hawng.
Aizawl Mayor chuan khawvel pumah tui a harsat lai leh tuihna a van tawh em em laia Venghlui khawtlangin tuihna laihchhuah tur leh mipui hnena pekchhuah tur an la nei thei chu lawmawm a tih thu a sawi a. AMC pawhin tuihna leh lui humhalh kawngah hmalak zel a tum thu a sawi.
Deputy Mayor R. Thanglura pawhin khawvel pumah tui a harsa tulh tulh tih sawiin, AMC budget za-a 30 chu tui humhalh leh tihpunna kaihhnawih atana hman a ni dawn tih a sawi bawk.
AMC Ward 17 bialtu Councillor David Zohmangaiha’n tuikhur siam thar chu Aizawl Dak Inpui awmna leh khawkar hlat zawng tehna (Mel) Zero point hming chawia phuah a nih thu a sawi. Tuihna zawn hna chu kumin March ni 16 atang khan Assam Rifle ram chhungah tan niin, tuihna hmuh a nih hnuah tuihna awmna atanga metre 400 pipe hmanga lain tuizem-ah chhunluh a ni a. Tuizema leng bak chu a bul Lamhnai tuikhurah pekchhawn a ni.
Assam Rifle rama tuihna ‘Aizawl Zero point tuikhur’ atang hian Bethlehem veng-ah pipe pahnih hmanga tui pek a nih bakah Venghlui Hmar venga H. Lalduhawma in bulah syntex litre 1500 hungin hetah pawh hian pek leh tum a ni bawk.
Zero point tuikhur siamna leh senso tul zawng zawng chu bialtu Councillor David Zohmangaiha hmalaknain Ward XVII tied fund atanga an hmuh a ni.