PC party-in kumtin fur a lo thlen apianga Zoramin ei leh bar leh mipui mamawh hrang hrang chawkluh kawngah harsatna a tawk thin tih hre reng chunga inbuatsaih lawk tum nachang hre lo ah Mizoram sorkar an puh a. “Ben harh chawp ngai Zoramin kan hrawn țhin hi a thanatthlak” an ti.
Tuialhtheih khuahkhir chungchang sawiin, PC party chuan “Meghalaya state chhunga leimin vanga Mizoram sorkar a talbuai leh ta hian ram leh mipuite ngaihsak kawnga Mizoram sorkar inthlahdahzia leh inhmakhuana tha a neih loh zia a tilang chiang hleah kan ngai” an ti bawk.
PC party chuan “Ramri buai avangte, leimin, tuilian leh harsatna hrang hrang a thlen palh thulha – buhfai, petrol leh diesel-a lo inhmakhua lawkna tura kum 35 liamtaa Brig. T. Sailo kaihhruai PC sorkarin thui tak hma a lo lak tawh bawhzui tum lo sorkar kan hrawn thinte avanga vawiin thlenga ram intodelhlo leh hnufual tak kan la ni fo mai hi a lungchhiatthlak kan ti” an ti a. “He Zoram tluchhe mek tungding leh tur hian theihtawp kan chhuah zel dawn a, Zoram mipuite thawhho puiah kan sawm” an ti bawk a ni.