Sports & Youth Services department-in kar kalta Zirtawpni tlai khan Khelo India Youth Games, tun thla ni 4 – 13 inkara Panchkula, Haryana-a neiha Mizoram atanga tel infiammi te chawimawina hun an buatsaih.
Sports Minister Robert Romawia Royte-in Khelo India Youth Games-a medal la te chu Sports Incentive pek an ni dawn tih sawiin, Gold Medal la te hnenah (Football-a Gold Medal mimal tin huamin) Rs. nuai 1 zel; Silver Medal la Rs. 70,000 leh Bronze Medal la Rs. 50,000 pek an nih tur thu a sawi. Medal la event-a coach te pawh National Incentive scheme-in a phal angin lawmman sum pek an ni dawn tih a sawi bawk.
Khelo India Youth Games-ah hian Mizoram atangin infiammi 59 te sports discipline 10 ah telin, Medal 4 (Gold – 2; Silver – 1 leh Bronze – 1) an la a. Mizoram Football Boys Team-in Kerela team 5 – 1 a hnehin champion an ni. Table Tennis-ah Jeho Himnakulhpuingheta’n Gold a la a. Boxing (Girls) 63 Kg Category ah Rudy Lalhmingmuani’n Silver a lak bakah Weightlifting (Boys) 67 kg Category-ah Silvan Beihrothatlo-a’n Bronze a la bawk a ni.