Congress party thupuangtu Dr Lallianchhunga’n mipuite phurrit tam lo zawngin health care bill ba chu a chin fel theih nia an hriat thu a sawi.
Inrinni khan MPCC media department-in Aizawl press club-ah chanchinbu mite an kawm a, an chairman Dr Lallianchhunga chuan,”Mizoram state health care scheme (MSHCS) hnuaia damlo inenkawlna senso bill ba, rulh nana Asian Development Bank (ADB) atanga Rs vbc 1000 puk tur anga sawi hi a tak tak anih chuan khuareia Mizoram mipui tana phurrit tur a ni,” a ti.
Dr Maliana chuan, ADB atanga loan an puk hian Mizoram leiba chu Rs vbc 80 velin a pung nghal lawih dawn tih sawiin, health care bill ba chu mipuite phurrit tam lo zawnga chin fel theiha an ngaih thu leh hmasawnna hnathawh ni chiah si lo, an laina duhsak zawngte hnena hna tam tak an pek chu hnuk let se bill ba rulh nan hmang zawk se an duhsak tih a sawi.
Chief Minister Zoramthanga’n ‘Congress sawrkar in MSHCS ah sum an dah lo’ nia a sawi chu thu diklo a nih thu sawiin, Congress Ministry in MSHCS-a sum a dah chu kum 2019-2020 Budget pharh ruala pharh ve Supplementary Demand 2018-2019 ah pawh chiang takin a lang,” a ti.
Hei hi Budget pharhtu Finance Minister leh Chief Minister ni bawk Zoramthanga’n ahre lo a nih chuan Health Care chungchang ringawt nilo, Mizoram sum leh pai dinhmun pawh ahre chiang lo hle tihna a nih thu sawiin, hei hi Mizoram tan a pawi takzet tih a sawi.
MNF sorkar laiin health Care Scheme-ah harsat na a thleng ziah thin tih Dr Maliana chuan sawiin,”Kum 2008 September 26-ah pawh MNF sorkar hnuaia dam lo bill peka harsatna awm chungchang chu langsar takin chanchinbute pawhin an chhuah hial,” a ti.
Kum 3 awrh MNF a sorkar chhungin dam lo bill pek theih loh cheng nuai 7100 chuang a tling khawm hman tih sawiin, hei hi a vanduaithlak takzet tih a sawi a, Congress sorkar erawh kha chuan MSHCS a siam tha tiin,”Congress sorkar hnuaiah dam lo te’n bill lakah harsatna lian tham an tawk ngai lo,” a ti bawk.