Mizoram sorkarin Mizoram State Health Care Scheme (MSHCS) hnuaia damlo enkawlna bill ba rulhna tura Asian Development Bank (ADB) atanga loan a lak tur chungchang chu MNF party-in thuchhuah siamin an sawifiah.
MNF thuchhuah chuan, MSHCS tihchangtlun zelna atan sorkarin ADB loan Rs vbc 1004.70 la tura a bawhzuina chu Screening Committee (Union Finance Ministry) in a pawm tawh tih sawiin,”Loan hi Funding Agency – ADB chuan Rs vbc 803.76 (80%) a pe chhuak ang a, a bak Rs vbc 200.94 (20%) chu Mizoram sorkar tum ve tur,” an ti.
ADB loan um chhuak turin harsatna tam tak paltlang a nih thu sawiin,”A tirah DoNER-in a hnawl a, Department of Expenditure, Ministry of Finance-in a hnawl leh a. Kan Chief Minister Pu Zoramthanga leh Health Minister Dr. R. Lalthangliana-te hmalaknain Department of Economic Affairs, Ministry of Finance dawr leh,” an ti a, theihtawpa beihzui a nih hnuah Screening Committee, Ministry of Finance chuan a pawm thei ta tih an sawi.
MNF chuan, ADB Loan puk tur Rs vbc 803.76 hi External Aided Project (EAP) hnuaia kal tur a ni a, EAP guidelines angin Central sorkarin 90% – Rs vbc 723.38 atangin a rul dawn tih an sawi a, loan puktu Mizoram Sorkarin 10% – Rs vbc 80.38 atangin a rul thung anga, Mizoram sorkarin ADB loan a puk tur zat chu Rs vbc 80.3 chauh a ni tih leh loan punna hi 2% p.a. vel ni tura ngaih a nih thu leh loan rulh hun chhung chu kum 15 vel tur a nih thu an sawi.
ADB loan lak tura hmachhawp mek chu MSHCS Corpus Fund (sum bawmpui)-a dah tur a ni a, Mizoram healthcare bill-te chu Corpus Fund peipunna pung (interest) atanga pekchhuah thin a nih thu an sawi a, corpus Fund-te hi Bank hrang hrang – MRB (Branch 7), Apex Bank (Branch 3), MUCO (Branch 2) leh Yes Bank (Branch 1)-ah dah a ni a, tun dinhmunah hian Corpus Fund Rs vbc 205.67 a la awm mek a, ADB Loan tihfel a nih hunah chuan Corpus Fund Rs vbc 1210.37 awm tura beisei a nih thu sawiin,”MSHCS chu tluang takin a kal chho zel thei dawn a ni,” an ti.
MSHCS hnuaiah damlo enkawl senso bill la pek chhuah loh Rs vbc 55 vel a awm thu MNF thuchhuah chuan sawiin, bill ba a tam chhan chu MNF sorkar hnuaiah dam lote’n natna zawng zawng an bill theih bakah beneficiary 1,00,000 chuang an tlin tawh avangin thla khat bill ringawt pawh Rs vbc 6-7 a ni tawh a, hetih lai hian Finance Dept. GoM-in Corpus Fund peipunna pung atangin quarter khat (thla 3 dan) zela bill a pekchhuah thin chu Rs vbc 4 vel a nih thu an sawi.
MNF thuchhuah chuan, Chief Minister Zoramthanga hian awm lo ata awmtir turin Baffacos, Peace Bonus, etc a lo sual chhuak tawh a, tunhnai maiah Union Budget-ah Mizoram tan Bamboo Link Road leh Bypass Road dah a nih thu leh tuna ADB Loan lian a sual hlawhtling leh zel tih sawiin,”Hei hi Mizoram tana Pathian bel ruat a nihzia tifiahtu a ni a. Kan chief minister hi kan chhuangin chawimawi a phu kan ti takzet a ni,” an ti bawk.